CAG REPORT LEH LUKA ZIAK

Tunlai Aizawl khawpui titi langsar tak pakhat chu CAG Report chung chang hi a ni awm e. He report hi a dik vek em nge a daw ve thei (?) tihte chu kan inhnialna niin a lang a. State tin leh sorkar laipui sum che vel endiktu leh sum hman ral dana kalphung ṭha zawk khawhhmuhtu thuneitu sang ber a nih avangin a report siam chu sorkar tan chuan ngaihthah tur awzawng a ni lo.

Sawi dan pakhat kan lo hriat veah chuan ‘Chanchinṭha Luka ziak ang tluka dika pawm tur a ni love’ tih a ni a. Chanchinṭha bu li (4) zingah hian Luka hian Isua chu Israel hnam chhandamtu leh mi zawng zawng chhandamtu a nih thu a sawi chiang bik a. Chanchinṭha dang pathuma kan hmuh ve loh engemaw zat tarlan a nei bawk a. Chungte chu Isua pian zana van zaipawl leh berampu chetdan te, Isua naupanlai leh Temple-a an zawn hmuh thu te, Samari mi ṭha leh fapa tlanbo chungchangte an ni. Isua rawngbawlnaa hmeichhiate an tel nasatzia pawh bu danga kan hmuh ve loh kan hmu a ni. Amaherawhchu, heng avang hian Luka ziak hi a dik ber a, a pawm nahawm ber kan ti ngai lo.

Thlah chhawng chhui danah pawh Matthaia chhui dan leh Luka chhui dante hi a inmil thlap bik lo. Heroda birthday lawm zana Johana lu tan thu pawh Luka hian a ziak lang bik lo. Engpawh ni se, Kristiante chuan Bible pum hi Pathian thu nung dik lo thei lovah kan pawm a nih hi. Chutiang deuh chuan India rampui huapa sorkar sum chet vel dan thlithlaitu, a aia thuneitu sang awm chuang lo CAG thu leh hlate chu kan pawm mai tur niin a lang.

Mizoram hian mahni pualin July 2007 aṭang khan Accountant General (AG) office kan nei ve ṭan a. Heta ṭang hian Mizoram sorkar sumpai hmanral dan zawng zawng chu an kutah a awm a. Sorkar department hrang hrang sum hmanral endik dan hi a tahtawlin a inkhaidiat thlap a. Department pakhat an audit dawn chuan an endik duh lai leh an duh dan te, hmachhawp an neih dan te sawipui hmasain Entry Conference an tih chu department hotute nen an nei phawt a. An thil ngaimawh zualpui te chu preliminary objection statement (POS) hmangin departmentah an thlen a. Department-in a hrilhfiah theih bak te chu audit hian objection note/ report an siam ta ṭhin a. Objection report-ah hian sum hman ral dan felhlel nia an hmuh te, sum hman dan kawnga department hnathawh dan leh kalphung duh khawp loh lai nia an hriat zawng zawng chu tarlan an ni a. Chung chu fel taka ziakin department hnenah chhanna siam turin an thlen leh ṭhin a ni.

Insawifiah leh inchhan fel theihna turin vawi duai lo in dawr zui a ni ṭhin a. Sawifiah ngai la awm te chu CAG chuan hun la hawng zui zelin ‘Draft para’ an tih hmangin sorkarah a thlen a, department chhan tura pek a ni zui zel ta ṭhin a, dik tak chuan department te hian field audit, AG leh CAG level thleng hian in sawi mamna hun tam tawk a nei. Draft para zawhah hi chuan CAG report kan tih tak maia hi a lo lang ta ṭhin a ni.

CAG report hian huam loh a hleih a nei lova, Department kalphung te, an hmalak danah te, a chhelai siamṭhatu ang hrimin rawtna hrang hrang a chhawp chhuak fova. Tun hnai maiah pawh khan rel (train) a khualzin veivakte ei leh in chungchang a sawiselna report bawhzuiin India Railway Catering and Tourism Coorperation (IRCTC) te chuan policy thar changtlung tak an kengkawh ṭan tih kan hria. Tunhnai maiah bawk sipai silaimu hman tur in daih loh leh quality chhiat thu te, state 24 zeta damdawi thi leh a ei dan tur ziak lan mumal loh chungchang thu CAG report Parliament-a pharh te kha kan hre theuh awm e. Chuvangin NLUP base-line survey chung changah pawh hian CAG chuan ngaimawh a nei a ni phawt mai.

Eng pawh ni sela, Audit thil tum ber chu sum hmandan fel fai leh a nihna tur taka hman hi a ni a. Mi thil tih dik loh chanchhuah tum hrim hrim lam a ni lova, insiamṭhatna (corrective measure) lam zawk a ni. Chuvangin, political game-a hman tur a ni lova, Friday session-a lo dodal chiam emaw party chhung inkhawma lo bawlphawn hluah tum emaw hian ram ropui min thlen dawn lo.

Chu ai chuan he report hi a thlenna tur Legislative Assembly hnuaia Finance Committee lian, Public Accounts Commi­ttee (PAC) opposition member-in a kaihhruai ṭhin hian engtin nge a um zui zel dawn tih chu kan thlir tur niin a lang.

- Zothankunga