Zoram political party-te thlirna

Mizoramah hian political party a lo ding ve nual tawh a, tun dinhmuna mipui hriat hlawh deuh deuhte chu MPC, ZNP, BJP, MPCC leh MNF-te an ni awm e. Tun hnaiah inthlan chuh tum pawl tharte ding ve mah se, anniho hi chu an la rei lo em avangin thlur bing vek vak lo ang.

MPC : MPC hi political party hlun tak, anmahnia (PC party an nih lai) sorkarna lo siam tawh leh MNF nena thawkho a, sorkarna lo siam tawh an ni. An founder president Brig. T Sailo (L) thupui 6th Basic Needs chu an thupui ber a ni la ni reng a ni. Tun dinhmunah MLA pakhat an nei mek a ni.

MPC hi party hlun tak nimah se, tun dinhmunah chuan an thawm a reh hle a, hei hi an hruaitute an active tawk loh vang a ni mai thei. Tun dinhmunah chuan anmahni bil chuan sorkarna an siamin ka ring lo a, a ruhte la ruh viau mah se, sorkarna siam turin a ruh tlat ho an tam si lo. Neutral vote han la tur lahin boruak an nei tlat si lo a, MLA an nei leh kher ang em tih hi ngaihtuah tham tak a ni. Thawhpui an nei dawn ni awmten ka lo hre vuai vuai a, mahse tuna an thawhpui tum nia ka hriat nen hi chuan ka beisei sang vak lo a, an dinhmun hre chiang a, seat tlemte chauh hauha party lian an thawhpui a nih loh chuan sorkarah an tel ka ring lo.

ZNP : Party hlun tak ni lo mah se, party thawm nei lian ve tak an ni awm e. ZNP mi leh sa hi an tam lutukin ka ring lo a, mahni bila sorkarna siam thei turah ka dah lo. An president hi mi thawm na tak a nih avangin MLA pakhatmah an nei lo chungin thawm an nei deuh thung a, mahse hqrs. aṭanga thawm neih ringawt hi chuan kawngro a su lo a, an unit leh block-te an zuai tawh viauin ka hria.

Sorkarnaah tel an tum hlein ka hria, chumi tur chuan Congress emaw MNF emaw an thawhpui a ngai dawn a, an dinhmun enin seat MNF leh Congress chuan seat an pek hnem duh erawh ka ring lo. Anmahni bil chuan sorkarna an siam a rinawm loh avangin thawhpui tur an zawng a nih pawhin thil mak a ni lo ang a, an inphahhniam thiam erawh a ngai viau ang. Anmahni bila an ding a nih erawh chuan bial ṭhenkhatah chuan vote an pawh heksakte tan pawi tham chu a la ni ang.

BJP : India ram hmun hrang hrangah BJP thlipui a tleh avangin Mizoramah pawh BJP hian thawm neih len an tum hle a, pawisa pawh an ren vakin a rinawm lo.

Mizo mipui nawlpui thin­lungah BJP hi a la tla na rih lo a, mahse BJP hruaitu lamin Kristian tana BJP hlauhawm lohzia an tlangaupui nasa a, mipui rilruah thawk na tak maw. BJP hruaitu lamin kum 2018 inthlanah sorkarna an siam ring mah se, kei chuan ka rinpui ve lo. An boruak kal dan a zirin chhim lamah MLA pakhat emaw pahnih emaw nei ve thut thei erawh an ni.

Manipur-ah MLA nei loa inthlan an hmachhawna sorkarna an chan avangin Mizoram hi an pawng zuam ngawt chuan an tifuhin a rinawm lo a, sorkarna siam aiin MLA neih tumin bial hnih thumah insawrbing se, an tan chuan a ṭha zawkin ka ring.

MNF : Eptu party lian berah MNF-te hi chhal ngam an ni awm e. Inthlan lehah pawh Congress-in sorkarna an siam lo a nih chuan MNF hi sorkarna fawng vuantu zingah an tel a nih pawhin a mak lo ang. Tun dinhmunah MLA 5 an nei mek a, sorkarna siam tur chuan MLA 16 dang an la mamawh belh a, an ṭan viau a ngai ang.

Eptu party lian ber an nih angin mipuite'n sorkar khalh ngil kawngah an lakah beiseina an nei sang a, hei hi an tih puitlin leh puitlin lohah an hma lam hun thui tak a innghat awm e. Tin, sorkarna siam tur chuan candidate siam kawngah an fimkhur a ngaiin ka hria a, mi­puiin an ngainat vak tawh lohte an paih ngam a, mipui ngai­nat zawng candidate an siam thiam a nih chuan an hmakhua a thim lutuk awm lo e.

Sorkarna siam an tum tak tak a nih chuan an tui zawng leh vei zawngte pawh hi an thlak a hun tawh viauin ka hriatpui a, CAG, ruhro leh zu hmang ringawt hi chuan sorkarna an siam a rinawm lo a, an Vigilance dept. lam active se an invawrh san theih zawk a beisei awm.

MPCC : MPCC hi sorkar­­na fawng chelh mektu an ni a, MLA 34 an nei a ni. Mawl taka ngaihtuah mai chuan MLA 13 hi chan mah se, sorkarna la siam thei an nih avangin paihthlak chu an huphurhawm khawp ang.

Politics hi chu thil mak tak a nih avangin, thla hnih khat chhungin boruak inthlak dawrh thei thil a ni. An term la neihte hi ṭha taka an hman chuan an dinhmun a eng khawp ang a, mahse hun tawp lamah hian chet chhiat a awl ve a, chu chu an pumpelh lo a nih erawh chuan an tan a pawi khawp ang.

An dinhmun an sawhngheh thiam a, an party chhungah harsatna a thleng lo a, eptu leh mipui lam mit tikham zawnga an kal lo a nih bawk chuan sorkarna an siam leh a nih pawhin thil mak a ni lo ang. Tunah pawh thawm ri va a awm ṭan a, an fimkhur viau a ngaiin ka ring. Eptute'n an role an play thiam leh thiam lohah an dinhmun thui tak an innghat bawkin a rinawm.

- Lalchhansanga