MLA-te hausak dan chhui tur thu
Vanglaini Dt. 19 July, 2017 chhuaka - MLA 9-te hausak dan chhui turin BJP-in ACB-ah FIR an theh lut, tih thu in rawn chhuah kha ka lo hmu a. Kha thu ka chhiar aṭanga khan ka rilru-ah zawhna tam tak a lo lut a, ka vei hle bawk a ni. Ṭhenkhat chuan ‘a mawl thlak’ in lo ti maithei a, mahse ka rilrua zawhna awmte hi sawi ve ka duh a ni.
1. ACB te hian tuten emaw mi hausakna dan kan hriat duh apiang chhui tir theih an ni em?
2. ACB te hi sorkar siam an niin a lang a, an chhui awm chin ruat bik te a awm em?
3. MLA emaw sorkar hnathawk an ni emaw tu pawh, mi te rinawm lohna hria apiangin FIR hi theh lut se, ACB hi chhui ngei tura thupek an ni em?
Awle, tuna MLA pakua (9) te an hausa nia hriaa an hausak dan chhui tura BJP-in FIR an theh luh chhan hi, an hausak dan tih a ni mai a, Pathian malsawmna dawngin tu pawh an lo hausa thei a, lawmpui aia tih hmingchhiat dan lo zawn chuk mai chu Kristian ram atan chuan kan tih awm lo tak niin a hriat theih. Politics-ah chuan a leng vek a ni maithei a, Mizo chu Kristian vek kan ni a, kan tih awm lo thilah chuan kan in hriatthiam nan Kristian ram kan nih hi i hre reng ang u.
Kan ram politics inbeihnaah mimal thil lutuka inbeihna hi thleng ve lo se ka ti a, mahse a thlen ve mai hlauhawm takin a awm ṭan ta. India milar Pu Rajiv-a thih chilh bomb vanga a thih dan kha kan hria, keini ramah pawh MNF leh Congress President te hi an ṭangkai rei tawh hle. Anni chungh pawh hian thil ṭha lo thlen tir duh kan hla bik tawh lova rin theih a ni.
Tuna kan MLA 9 te chunga thil thleng hian ka ngaihtuahna a ti thui em mai a, kan sawi thleng hram a ni. A tak chu a thleng ve em lo’ng chu tiin eng thilah pawh inbeihna thianghlim china awm turin ṭan la tlang zel turin politician te ka ngen duh a ni e.
- R. Saptawna, Sihphir Biak In Veng