A letling
Tun hnaiah Lunglei YMA ten an MLA te sâwmkhâwmin, Lunglei District chhunga kawng siam chungchang an sawipui a. Sorkar hian kawng siam chungchangah YMA te a thawhpui a, YMA-in hetia hma an la a, hna muang leh hna chhiate an enpui a, hna a ṭhat zawk nana hma an la ṭhin hi a ropuiin, YMA kan nei hi a hlutna kan hmuh belh leh a ni.
Lunglei YMA ten ṭhahnemngai tak maia an District chhunga MLA te an sâwmkhawm hi a lehlam zawnga thlir erawh chuan an MLA te an mualpho deuh em a tih theih. An bial chhunga hmasawnna hnathawh a ṭhat leh ṭhat loh hi MLA ten hian an thlirpui fo tur zawk a ni a, YMA inrawlh buai kher ngai lo hian, MLA te hian hma la zawk ta se, MLA ten an tih tur tak an ti a ni zawk ang. An bialtute hian an bialte an tlawh ngai lo a, a kawng an siam a ṭhat tawk lohnate an hmuhpui ngai lo niin a ngaih theih a. A nih loh pawhin, an ngai pawimawh vak lo a, an tlân pêl mai mai niin a ngaih theih bawk.
MLA te hian an bial chhunga YMA te kokhawmin, hmasawnna hnathawha a chhe lai leh siam ṭhat tâwk lohte hi YMA te hi lo enpui tura fuih awm zawk tak an ni a. An bial chhungah an awm reng thei si lo a, a hmuna awm zawk YMA te kutah an innghah mai a ṭul zawkziate sawi a, YMA te hi kokhawm ni ta zawk se, MLA chak tak, an bialte ngaihtuah tak niin an sawi theih ang. YMA zawkina an kokhawm a, hetiang hi a letling a ni. Ram hruaitu kan tihte hian MLA status hi nuam an ti a, a mawhphurhna tak tak erawh an thawk peih lo emaw, thawh an tum lo emaw tih mai tur a ni.
Lunglei YMA hian hmasawnna hna ṭha taka thawh a nih theih nana an bialtu MLA te an koh pawha kal thei lo an awm nual pawh kha a mak hle mai. Lehkhabu tlangzarh tur emaw, lungphun hawn tur emaw lamah hi chuan an hman thei viau ṭhinin a lang a; hetiang, thil pawimawh, mirethei leh hmun kilkhawra mite pawhin an ṭangkaipui tur, kawng ṭha zawka siam a nih theih dan tur sawihonaa an tel thei lo hi, chhan ṭha a nei a ni chêk ang a; a chhan hre ve lem lote tan chuan thil mak tak chu a ni.
Hmasawnna hnathawh chi hrang hrangah, hna a ṭhat leh ṭhat loh chungchangah a enkawltu Dept lam aia tlawmngai pawl kan ring zawk ta tlat maite hi a mak hle mai. Engineer rual ṭhahnem tak kan nei tawh a, hna hmu lo pawh tam tak an awm tawh karah, hmasawnna hnathawh ṭha leh ṭhat loh enfiah tura tlawmngai pawl kan ring tlat mai hi a letling hle mai. Ruihhlo do tur pawhin tlawmngai pawl kan beisei a, pian kum dik zawk hriat nan Kohhran kan beisei bawk a. Tlawmngaia duty-ten mi kut an lo thlak a, mualphona a awm leh ṭhinte hi tlawmngai pawl zir loh a ni lo, sorkar hian a tih tur a tih loh vang mai mai zawk a ni.
Kan MLA te, sorkar (ministry) te hian an tih tur tak hi ti ṭhin se, tlawmngaia duty insiam a, kut inthlak thawmte a awm lo ang a, hmasawnna hnathawh chi hrang hrang pawh a nih tur ang takin an thawk ang. 'Nihna' hi kan thlahlel a, nihnain a ken tel mawhphurhna erawh kan la leh ngam si lo hi kan ram buaina a ni.
- Ramropuia