Mawhphurhna la ngam sawrkar

Tunhnai khan TV chanchinthar leh chanchinbu lamah, ZPM party working president K. Sapdanga chuan, ram tana mawhphurhna la ngam roreltu nih an tum thu leh, Mizo hnam chhuan la awm zel tur tan pawi khawih ve loh hrâm an tum thu a sawi tih kan lo hria, a thu sawi ang hian thleng dik thei se a duhawm hle.

Hripui leng chauh a ni lo, sorkar hmalakna leh thiltih hrang hrangah tu nge a mawhphurtu ber hriat theih loh chang a awm fo. Chutiang hunah chuan, 'E kei ka ni e, ka tih dik loh a ni,' ti ngam an awm a ngai, thil ṭha lamah chuan kan tel ve vak lohnaah pawh mawhphurtu leh tel ve nih tumin kan insawi lut zel tho si.

Lengpui Airport sak lai a chim a, tu nge mawhphurtu ber hriat a ni lem lo. A satu ngai chuan a hna a thawk chhunzawm mawlh mawlh a, a thil tihsual avanga hrem leh thunun a nih kan hre hran lo, hna thawhna tur sum a hmuh belh phah hlauh a nih phei chuan atan chuan a pawina a awm lem lo hial ang.

Hmanni lawk kha a la ni, skywalk leh ropeway chungchang kan sawi huai huai lai kha. Sawrkar hmasa Congress leh tuna sawrkarna chelhtu MNF chuan a mawhphurtu zawk nih an duh lo a, an inpuh tawn mek - an inpuh tawn chhan hi hna thawh a chhiat bakah sum a bo hnem vang a ni.

Kan naupan deuh lai chuan, in chhung bungrua eng maw ber hi a titu awm miah loa a chhiat chang a awm a, hmanruate hi tu 'ma khawih lohin a bo fo. Unau zinga tu emaw ber khan khawih, mahse kan nu lah pa chungah a titu nih kan duh lo a, tu 'ma khawih a ni lo mai ṭhin.

Chutiang deuh chuan Mizorama sawrkarna fawng chelh tawhtu party pahnih pawh hian thil ṭha lo chu an inhnawn a, a titu zawk nih an duh ngai lo. Ka tih a ni lo, anni tih zawk a ni, kan hun lai a ni lo, tih chu thiam takin an insawisiak vel mai mai a nih hi maw.

Khawihtu awm loin pawisa a bo a, tu berin nge kawl tih hriat lohin hmanruate a awmna tur hmunah a awm lo. Sawntu hriat lohin sawrkar hnathawk chu party mi leh sa an tih lungawi loh vang mai maiin sawn an ni a, mahse hengti hi a titu an awm ngai lo.

Thil ṭha lo apiangah a titu nih an duh ngai lo a, an inpuh zel - an la inpuh chhunzawm reng pawhin a rinawm. Mizorama thil thleng reng reng hi titu awm lo an awm lo, chuvangin sawrkar tawh pahnih hian a ṭha lo lamah chuan dawihzep takin mawhphurna an la ngam lo tih chu thil chiang tak a ni.

Kan ram rorel a sual emaw, a fuh tawk lo a nih pawhin mipui aiawh tura thlan, dem leh kawh rawn ni ngam tura intawktarhte hi chuan mawhphurhna la ngam rawh se, inthlan dawn hnaiha ngaihdam indil leh ngawt ṭhin lo hian a hun laiin mawhphurhna la se, hrem ngai an awm a nih chuan hrem ngam ṭhin rawh se.

Infiamna leh sawrkar hmasakna ṭhenkhatah hlawhtlinna chang an awm a, kan tel ve miah lohna leh midang hmalakna rah chhuahah lansarh kan tum leh si - hei hi mi dawihzep leh mi pamham zia dik tak a ni, mipui lamin tu nge lemchang ṭhin chu kan hre kar.

Mipui hi a lawm, kan ram hruaitute kan nawr dik lo - thil ṭha lo ti lo thei loin kan siam, kan han ti leh ringawt a. Mipui ṭha hmasa tura beiseitu an awm fo hi a mak, mipui hi ṭha hmasa ni ila hruaitu kan mamawh lo ang, khawi ramah mah ram hruaitu aiin mipui an ṭha hmasa ngai lo.

Hruai ngai leh enkawl ngai kan nih avangin kan aiawh tur kan thlang ṭhin. Anni chuan dik leh fel takin ro rel se la, an hnungah mipui chu kan kal mai ang. Mizo mipuite hi hruai harsa kan ni lo ang, hruaitu ṭha leh entawn tlak kan nei a nih phawt chuan, kawng dikah kan la kal duak maiin a rinawm.

- Sanga, Saitual