Mene, tekel, kan tling zo lo maw?

Mawia chu an khua Primary school-a thiam ber a ni a. Khaw dang dang mite nen Middle school a kal ho ta a, naupang 38 zingah 37-na a ni a! (Zoram buai hmaa thil awm tak tak). HSLC leh HSSLC result a ropui ṭhin e. Full marks hmu thei thuak thuak an tam hle. Hetiang thiam thei tak tak kal chho zelte hian UPSC exam an han hmachhawn ve ta a le... ‘Top 1000’-ah pawh Mizo hming a lang ta si lo. Engnge a chhan ni ta ang?

1. ‘Thiam’ kan tih hi an la thiam tawk lo fo: ‘Thiam’ kan inti hma lutuk a, kan tehfung a ṭha tawk lova, kan lawmna a te tham a, kan infak hma lutuk deuh. Mizoram khaw tin maiah hian sikul naupang zingah ‘O’ grade hmu thei an ther fuk mai! Thiam filawr chungchuang (outstanding) te chu mi za zingah pahnih-khat an inlar ve zeuh tura ngaih ṭhin kha a ni a; tunah erawh naupang 30 zingah sawm dawn laite hian ‘O’ grade an hmu. Lawmpui tur nge nuihzat tur? Kan rilru kan ti-piangsual der tawh a ni lo maw?

2. Tehna (measurement) kan la hmang thiam tak tak lo: Evaluation a ni emaw, examination a ni emaw, Unit Test pawh lo ni se, an nihphung ‘scientific’-zia hi kan la pawh phak tak tak lo va; han sawngbawl vel dan (techniques) thiam chiang tak tak pawh kan la awm hek lo. “3-dimension Blue-Print” te pawh kan tan chuan a la ril viau mai. Inzirtir thiam chu sawi loh, MBSE meuhvin ‘blue-print sample’ an siam ṭhinte pawh hi, a ‘format’ dah khah ve hrim hrim, zawhna ṭha tak hring chhuak thei a ni dawn em tih ngaihtuahna tel lutuk lova siam a ang ṭhin hle.

Tin, HSLC exam zawhnate meuh pawh, kil hrang hrang aṭanga question dinhmun bihchianna ‘question-wise analysis chart’ kan siam tel ngai lo. Thil awm ve ngai a ni tih pawh kan hre meuh lo! Question paper chu a dik kim em? A fun kim em? A inkhuangrual em? A tehchhuah tum tak a teh fuh em? etc. tih hre chiang chuang miah lovin naupang kan exam-tir ṭhin a ni. Chipchiar taka sawina hmun a awm loh avangin, a pawimawh pawnlawi pahnih lek han thlur bing ila:

(a) A tum tak a teh chhuak em? Kan question-te hi an ‘valid’ em? kan ti a nih chu. Mizoṭawng zawhna-ahte hian, Mizoṭawng an thiam leh thiam loh tehna ni chuang lo, a bu chhung thu an hriat leh hriat loh tehna lam a la tam khawp mai. English pawh a fihlim bik lo. Social Science zawhna tam tak hian naupangte chu hual veltu boruak thlir thiamna kawnga ṭan la turin a fuih lutuk lo. Note bu zir turin a fuih deuh ber mai.

(b) Thiam leh thiam lo thlei hrangtu rin tlak a ni em? Kan question-te chu an ‘reliable’ em? kan ti a ni. Buh thlei thiam chuan a hum leh a kem a thliar hrang vek mai. Chutiang bawkin question ṭha chuan thiam lo takzet leh thiam takzet te chu a chhawk hrang nalh mai a ni. Kan question kalphung tlangpui hi chuan zir fuh leh fuh lo te, vannei leh vanduai te a zawng chhuak a ni ber.

Tih dan mawl berah pawh zawhna chu chi thum- a awl (easy), a vantlang (average) leh a har (difficult)-ah an ṭhen thlap ṭhin. Hmun ṭhenkhatah phei chuan a awl te, a har te hi chi thum laiah an la ṭhen sawm leh chhawng. Tuna MBSE (HSLC Maths) hi entir nan lo hmang ta ila. Hetah hian Easy-30 % marks, Average-50% marks, Difficult-20% marks a ni. Hemi ‘weightage’ ang thlap hian question lo ‘set’ ta pawh ni se, naupang chuan zawhna har chhang tel miah lo pawhin letter marks (30%+50%) a hmu thei dawn tho a nih chu.

Hei mai hi a la ni lo cheu. Syllabus leh a target/ aims te, text-book te, MBSE-in question design a lo duan lawkte nena han en mil hian zawhna kalphung hi a dik tawk hauh lo mai. A awl (easy) a tlem lutuk a; a har (difficult) a awm ngai mang lo thung. Naupang chak lote an ‘fail’ thuai a; thiam thei ve vantlang zir peih deuh tan ‘Letter’ hmuh a awl hle thung.

Hrilhfiah dan tlangpui berah chuan, awl (easy) chu naupang zawng zawngin an thiam tura ngaih, concept leh process mawl te te, awl tak tak an ni tur a ni. Naupang thiam lo zual takzet chhawk chhuaktu an ni. Zirlaibu huam chhunga a pawnlawi leh langsar tak tak, naupangte thiam zawng tak tur hlir kan zawt ang. Zawhna siamtute hian an dap kil mah mah. Naupangte hian thiam leh hriat an nei ve ṭeuh mai. Thiam nei mang lo ang maia marks 10% lek te an hmu hi chu zawhna siamtu tih dik loh a ni ve thei tlat! Eng vangin nge naupang hriat loh zawng kher a zawh?

‘Easy level’ dik taka question set ni se, naupangin marks10 emaw chauh a la hmu fo a nih chuan, kha naupang kha pawl sawm zir turin a tlak lo tihna a ni ang. Phak lo chung emaw, ti ṭha duh lo chunga HSLC exam hmachhawn emaw a ni ang a; sikul chawlhtir emaw, pawl hniam zawka thawn kir leh hial emaw pawh a ṭha zawk mai thei.

Zawhna vantlang (average) hi chu zirlaibu-a examples leh exercises zul zui ang hi a ni deuh ber a, tuna kan zawhna tam ber hi an ni. Amaherawhchu, zirlaibu-a mi ang ngau ngau kan zawt ṭhin hi chu a zia lo hle thung.

Zawhna har (difficult) hi chu kawng sah sa awm lem lo (off the beaten track), ‘chenna ngai loh ram fan’ an sawi ang mai, remhriatna leh thluak themthiamna vawrtawp (thinking skill) hmanga kan inelna tur a ni. Thiam tak zet fiahna, naupang za-a sawmkua-te phak bak deuh tura ngaih a ni. Naupang chu Zarkawt aṭangin Kulikawn thleng i hruai ṭhin. Amah pawhin a kal ngam tawh. Tunah erawh chuan amah chauhvin Tlangnuam emaw, Hlimen emaw a zawng chhuak ve tawh dawn a ni. Zirlaibu-a problem chuktuah khawmin problem thar kan siam sak ṭhin dawn a ni.

Mihring thluak themthiamna hi chhawr­dawh parukah an ṭhen a; tuna kan question ho chhang tur hian a hniam pathum- knowledge, comprehension leh application bak a ṭul meuh lo. Tin, problem ‘solve’ thiam aiin, problem siam thiam hi an chungnung fe tih kan ngaihtuah tawh ṭhin em? Tun dinhmunah thluak ṭhuai vir map thei zawhna (thought-provoking questions) chi thar siam chhuak zung zung thei khawp mi thiam kan la nei lo.

‘Tehfung ṭha’ kan neih hma loh chuan ‘thiamna ṭha’ kan thar chhuak dawn lo reng reng. Tehna huang zim, sang lem lo tak tak hmangin naupang thiam thei tak tak kan teh a, a thiam ber pawh hriat hran harsa khawpin, mitdel pawnto an sawi ang maiin an ding khawm tup mai a nih hi. ‘Top Ten’-ah sawm leh pali laite an awm em ni kha? Pen sawm lekah tlan chak ber thliar thiam a har ṭhin. Pen sang khatah chuan a chiang nalh mai ang. Naupang zuan zang tak tak feet thum lek lek zuan khum tura kan ineltir mai mai hi, an ṭhan lenna tur daltu lian tak kan ni.

Mit daktawr te, ha daktawr te, in sa mawi thiam (architech) leh a sa rinawm thiam (structural engineer) te thleng pawha an awm hran thlip thlep tawh hnu-ah pawh a bulpui ber tur zawk education-ah chuan administration lama daktawr te, syllabus leh text-book expert (tak tak) te, evaluation lama daktawr puitling te, pedagogy leh teaching technology lama daktawr (puitling) te kan la awm si lo maw? Thiamna hmantlak (tak tak) nei kan va mamawh em! Pa pakhat pawh silai licence a ak reng chung siin savawmin a um hrep e an tih kha.

Mi thiam thei (super-brains) te’n education an luhchilh a ngai takzet ta a ni e. Sawrkar hian medical leh engineering lines aia hnun-hnang leh mawm-hmai, thlan nah-awm zawk fe turin education line hrang hrang zirna tur kawng buatsaih thuai rawh se. Hei hi kan ram mamawh bulpui ber a ni. Tuna kan ‘education system’ hi chuan ‘world-class’ pe thei khawp thiamna leh tha-hrui chingkim a nei rih lo. Nghardai kungah grep a rah thei lo tih kan hria e.

- LB Tluanga