NEDP ENG TAK ANG MAW?

Congress party chuan nakkum inthlan tur thlir ranin hma­lakna thar tur NEDP (New Economic De­velopment Policy) a duang a, a sawi lamah an thiam bawk a, thingtlang mite chu min hneh hmel hle mai. A hming an sawi ringawt pawhin beng a verh duh khawp mai!

MNF lamin SEDP (Social Economic Development Policy) an lo duang ve bawk si a, a hming a inang dun si a, a khawi zawk nge ṭha ang tih hriatthiam a har hle! A hming aṭang ringawt pawh hian phir ni mai awm an ni a, a khawi zawk hi nge piang hmasa tih pawh keini ang rual chu kan sipai bang bo map mai! An sawi thiam bawk si a, thlan zawk tur a vang duh hle mai.

NEDP hi chu kan hotupa berin a sawi dan kha chuan NLUP dawng tawhtute, hma­lakna sukuk emaw la puitlin lo emaw hlawh­tling zo lote emaw han chhawm­dawl lehna tur niawm tak khan a sawi a. Chuti a nih chuan NLUP la dawng ve hauh lote tan chuan beisei tur a van hmel hle awm e.

Hetiang hi ni ta sela NLUP dawng tawh, an pawisa dawn thildanga lo hmanga Fridge emaw Scooty emaw Bike emaw lo lei ta daih angte kha an chhawmdawl leh dawn tihna emawni dawn tihte min ngaihtuahtir rum rum a! Tin, NLUP-ah bawng vulh thlang, NLUP sem tur a awm tawh lo tih hriat avanga an bawng vulhlai lo hralh fai ta vekte leh lo KG zo vek te ang te hi an chhawmdawl lehzel dawn ang em le?

A nih loh vek pawh­in NLUP a khawilai mi sangha dil emaw lo kawk ve mai te, mau chin thlang a, ram hnuai mau hmun lo kawk ve ta mai ang chi te kha a eng ber nge an han chhawmdawl leh ang le? NLUP la hlawhtlinpui lo hi Zoram mi tam zawkfet hi an nihhmelsi a, chu­vangin heng ang chi chhawmdawl lehna tur a nih chuan hlawhtlinna chu a hlat hmel viau si a. Tin, a sem a sem policy bawk­ah kan tlu lut leh mai ang tih a hlauhawm thei rum rum mai awm e.

Nikum kumtir lam thleng kha chuanhe NEDP hia thawm atang chuan tha hle turah kan lo ngai a. Mahse hman deuh maia khaw hrang hranga Congress Party Unit tinte hnena a pawisa faia cheng nuai nga zeta an han sem a, khaw chhunga hna hrang hrang an thawh aṭang kha chuan a kalhmang tur- party induhsakna bawk a kawk dawn a nih hmel mang e a tih theih.

Party duhsakna hleihluak leh uchuak lutuka kal reng mai hi sim a hun ta hle mai. Mi state-te chu hmasawnna lamah an kal chak a, tihlaiin keini state ve zawng hnungah kawl ek kan thai reng a nih hi.

Party thuvawnah Bible chang ṭha pui pui tar kiaukuau mah ila a tak rama dikna aia party kan dah lal chhung chuan ram ropui kan thlen a rinawm lo.

NEDP pawh hi kan party hruaitute hian piantharna nena an enkawl a nih loh chuan NLUP ang bawk khan Zunte nu siam ang mai kan ram hi kan nih phah ang tih a hlauhawm hlel love!

- Patrick Z, Chhingchhip