Sorkar chet dan leh hlawh pûk

June 13, 2020-a Vanglaini Editorial kha ka chhiar ve khauh a, ngaihtuahna a ti thui a, han tuihnih ve hlek ṭula hriatna nei chungin ka thlawp thu ka rawn sawi belh ve ang e. Thiam ang tawk tawkin. 

"Sorkar chet dan leh hlawh puk" tih hnuaiah khan he thu hi a inziak a: "Tunah hian sorkarin sum tam tak a senna SEDP Board 14 a awm a, heng board-ah hian hnathawktu a hranpaa lâk vek a ni. Sorkar hnathawk kan mamawh aia tam kan nei tia an sawi khawpa sorkar hnathawk awm tamna state ni chung a, a thawk sate ring zo lo ang maia mi thar lâk hi sum neih loh lai chuan a inhmeh lo hle. Sorkar department hrang hrang awmin a enkawltu minister an awm vek chunga board hranpa siam leh hi sum khawh­ralna angah a ngaih theih. 

Sorkar lam chuan hmasawnna tura sorkar ruahmanna kal meka sum hman hi Covid-19 sum nen thil thuhmun ni lo angin sawi mah se, sorkar hnathawk hlawh pawh hi Covid-19 dona tur sum a ni hauh lo a, a ṭulna avangin an pawt zawk mai dâwn a ni. Hei vang hian SEDP Board sum a ni emaw, chumi hnuaia mau chinna tur sum a ni emaw, PAHOSS sum leh construction work thawhna tur contract sum hrang hrangte pawh hi Covid-19 dona atana pawh theih loh a nihna a awm bîk dâwn em ni?" tih hi.

Sorkar hnathawk kan neih tam tehlul nen anni hian SEDP Board Member te tel lo hian SEDP hi an kal pui thei mai dawn lo em ni? Kan sorkar hian sum nei lovin a puk chawp dawn a nih ai chuan ṭul lova sum senna hi titawp hmasa phawt se a inhmeh ang. 

SEDP Board lama Vice Chairman te hian an zin veivahnaah hian sorkar an ti hek sak bawk si, an hnuaia staff hrang hrang an neih hi Sorkar Department lamah chhawr sen loh hna nei mang lo an awm sup sup bawk a, hmang 

ṭangkai ta mai se. Sorkar hnathawk hlawh puk chunga lehlama sum ren na nei reng reng lo anga awm bawk si hi hriatthiam har lai chu a ni. 

"PAHOSS sum leh construction work thawhna tur contract sum hrang hrangte," tih hi a inziak leh bawk a. Ṭhenkhat chuan Mau Chi Tender te pawh an sawi a, Mau Chi hi chu sorkarin a tum lawk tawh thil a nih avangin season nei a ni a, kei chuan thui tak ka hrethiam thei a ni. Ka hriatthiam loh chu Aizawla motor parking siamna atan duhsak zawngte pawisa a hlawmin an pe tawp tawp a, he PAHOSS hi titawp si lovin engtin nge sorkar hnathawk pawisa an puk theih le? Mipuiin an theih ang tawk tawk Chief Minister Relief Fund-ah an chhung lut a, naupangin an khawl bawm chhu kehin pawisa an thawh hial asin! 

Sorkar chuan Aizawla motor parking siamna tur, mimal hnen­ah a nuai bi tam takin a la sem ham ham mawle! Hei hi ngaihtuah ngun ngai ka tih tak chu a ni.

Heng thil hrang hranga pawisate hi Covid-19 dona atan hman pên theih loh ni ta ang se, sorkar hnathawk pawisa hi chu hman pên phal tih a inziak bik em ni le? Sorkarin tun dinhmuna ṭul lova pawisa a sen te pawh hi titawp hmasa ta se, chumi hnuah chuan sorkar hnathawk hlawh hi chu puk ta chauh se a ṭha lo maw? 

Ṭhenawm pain, "Pawisa ka nei lova, hri a leng bawk si a, chumi dona atan chuan i pawisa ka lo puk," tiin min dil se, pawisa puk tir ta ila, mahse i ṭhenawmpa chuan i pawisa puk chung chuan a duhsak zawng a chhungte tan a pawisa neih sa dang chu inren miah lovin la hmang ham ham ta se. Pawisa puk tirtu chu i lungawi hauh lovang mawle!