SEDP sem dan hi mipui zahlohna rawng a kai (Nuai 3 aṭangin 8.3% chiah a ni Rs 25,000 hi)

Kum 2018 inthlan dawn khan mipuiin, "Cheng nuai 3 min pe ula kan thlang tling ang che u," kan ti reng reng lova, MNF hian SEDP an siama chutah chuan cheng nuai 3 sem min tiam a zawk. Pu Zoramthanga phei chuan cheng nuai 3 mai ni lovin NLUP dawng tawhte pawhin an dawn tur thu chiang taka min tiamna a video pawh a la awm. Kum 2019 aṭanga sorkar tawhin kum 2022 tawp lamah cheng nuai 3 chu sawi loh cheng 25,000 lek an sem tur hi chu puan pawh an puang ngam zawk ka ti a, mipui hnena an intiamna an zah lo hle a ni.

Facebook pakhatah chuan, "Cheng nuai 1 a taka kan sem chungin Congress kha kan tla chiang hle a, cheng nuai 3 tiam chunga Rs 25,000 sema tlin tum hi chu vana rah ang a ni," tih in ziak ka hmu. Hei hian tlin leh tlin loh politics a rawn khel a, keia ngaih pawimawh ve thung chu tlin leh tlin loh politics ni ve lovin mipui din chhuahna tur zawk a ni.

Cheng nuai 3 hi min pe tak tak se kan din chhuahna chance hi a sang a, chuvangin nuai 3 hi kan nghakhlel viau a ni. Tuna an sem cheng 25,000 hi chuan engtin mah kan ding chhuak dawn lova, phone ṭha ve pangngai man a daih ṭawk bakah chu pawh chu engtikah nge an sem chhuah dawn reng reng ni? Kan Politician te hian min hre chiang a, Krismas dawn hnaiah chhungkaw bazar na kan mamawh dawn tih hre chungin ber/bar thla hnaih lamah pawisa sem an han sawi ri a. Chhungkaw rethei tawh laileng tan chuan cheng 1,000 pawh a awhawm em avangin tuna cheng 25,000 hi chu lawm takin kan inchuh dawn a, mahse kan din chhuah pui dawn si lo. Mizoram sorkar sum tam tak chu chhungkaw hrang hrang tih lawmna atan an sem kual ang a, chu ram chu retheiin a rum dawn si a ni.

Tuna MNF hruaitute ka zawhna chu min chhan theih chuan kum 4 dawn an sorkar hnu pawhin cheng 25,000 an sem thei hram dawn niin a lang a, chu chu SEDP-a an intiamna Rs. 300000 aṭangin 8.3% a ni. Kan dil pawh ni lo, kan phût pawh ni lovin SEDP-ah pawisa min pek an rawn in tiam a, chu an intiam aṭanga 8.3% lek chu min pek an tum a, a bak zawng 91.7% hi tunah hian kan sorkar hian kan pawisa a la ba tiin kan sawi ngam ang.

Chutia leiba sawi takah chuan tunah hian a maktaduai tel meuh tak tak chu Health Care Scheme lamah kan pawisa hi sorkar hian min la batsak bawk a, damlo inentirna pawisa tling khawm tawh chu sorkar hian a pek kir tur la pe ve thei lovin a ba mek a ni. Sorkar lama contractor leh supplier te hi han zawt ila pawisa batsak ve mek bawk an ni a, chutih lai chuan tunah hian pawisa sem sawi rik a ni bawk nen, pawisa sem chu kan din chhuah pui theih tur zat a nih bawk si loh avangin sorkar chet duh dan hian rilru hi a tihah a ni.

Tlin politics leh vote lei politics ringawt ni lo hian mipui din chhuahna politics hi khel thleng ve tawh se. Tuna cheng 25,000 hi chu MNF intiamna cheng nuai 3 aṭangin 8.3% lek a nih chuan vote tu 8.3% lek khan vote nawn dawn ta se an duh dawn lo nasa si a. Hei hi politics khelhna leh nakkum laia inthlanna tur atana boruak siamna a nih ngai chuan vote 8.3% hmangin mipuiin an chhang let lo vang tih a sawi theih ta love.

"Pawisa an dawn chuan mipui rilru sukthlek chu a danglam vek ang," tih hmang hian min bum nawn tum tawh lo se. Mizoram mipuite hian tunlai khawvel changkang tawhah hian sorkar pawisa che vel leh min lei an tum dan hi kan teh thiam a ni. Cheng 25,000 hi i ngaihtuah chian chuan thla tina dawn ni lo, kum tina dawn ni lo, kum li dawn sorkar hnua an sem a nih ngai chuan, kum li chhungin thla 12 a awm a, thla khata SEDP aṭanga sorkar sum min pek chu Rs 520 ang vel tihna a ni. Rs 520 thla khata dawng chung hian din chhuah theih a ni miah lo tih kan chiang si a.

Zoram mipui hnenah cheng nuai 3 min rawn tiam a, chu mite chu kan thlang tlingin sorkar an han siam ta a. Contract an han insem sang sang a, ṭul lo thleng thlenga project siamin thiltithei deuh chuan an um chhuak zung zung a. Kan mamawh bak bak hna an insiam zawh tawh hnuah SEDP chu min pe ve dawn emaw kan ti a, thla khata cheng 520 vel hisap min pe a ni. Min rawn intiam khum kher lo se kan ṭhing let lovang a, min tiam avangin min tiamtu, vote hmanga kan chhan let tawh an nih avangin tunah hian cheng 27,5000 hi min pe tel turin kan phut tlat a ni. Hei hi an intiamna aṭanga 91% vel a ni a, kan sorkar hian min pe rawh se.

Nuai 3 min tiam a, chumi aṭanga 8.3% lek cheng 25,000 sem hmang hi chuan mipui hi in ti lawm zo lo tawp ang. Mipui hian zah an phu ve a ni. An phût leh dil a ni lova, cheng nuai 3 hi nangmahni min tiam a nih kha aw, kan hre reng ang.

- Lalremruata