Overhauling

Thlai thar hralh te, a process thute kan khel luih luih a, a bul ber chu Agri Produces Marketing Regulations kan nei lo hi a ni zel mai. Hei hi a hmanhmawh thlak ber zawk a ni.

Sumdawnna mumal tak, thianghlim tak, kalkawng awmze nei taka eco-system siam tur chuan sorkarin dan leh dun a siam hmasak a ngai.

Eng ang pawhin sorkar hausa leh kut hnathawkte lamṭang sorkar pawh nei ila, sor­karin hna a thawh dan tur ruang­am leh a player-te venghimtu dan leh dun a awm loh chuan sorkar a che thei ngai lo ang.

Sumdawnna kalpui dan thiam lohna hmun apiang­ah ram a rethei. Kan awh em em ram hmsawn te hi awmze nei, dan hnuaia sumdawnna a kal theih nana dan leh dun mumal tak nei vek an ni zel. American dream te hi Japanese hovin "Japanese i nih chuan i rethei thiang lo" an lo tih ṭhin thuamchakna tho kha a ni.

Silicon Valley eco-system angte khu khawvel thluak ṭha hovin an pan khawmna chhan chu a player te vengtu dan leh hrai an neih ṭhat em em vang a ni.

Mizote pawh sumdawn thiam loh vang ngawr ngawr piah lamah agripreneur te venghimtu dan leh dun kan neih loh avangin kan ropui thei lo a nih ber hi maw?

Kan sorkar engine hrawn tawh­ho hi a model a hlui lutuk tawh a. A mechanical lutuk a, engine hi down ila, micro-chips based engine vuah ila. A body te hi denting ti ila, rawng thar hlak, 2k matt finish ngatin paint ila. A ke-ah pawh hian Michelin emaw Yakohama ngat hmang ve tawh ila. Petrol leh diesel heh lo takin, insawh boh boh lovin kan tum ramah min thlen zung zung mai ang.

A la sorkar ve lo ber party hotute lah chuan "Kan flagship policy chu mipuite an ni," an la ti ta deuh deuh a! A buk ṭhelhin kan la ṭhelh zel zawng a nih hi maw? Flagship policy awmzia pawh zir ṭhat leh a ngai hlawm a nih hi.

A rorelna fung ber vuantu lah chuan tlawmngai pawlte hnenah a hnuaia thawkte lo vilzui turin ala ngen ta deuh deuh a...

A kalkawng kan tihfuh hun hunah kan kang zawt mai ang.

- Joseph L Ralte