EYE DONATION

Kum tin India ramah midangte tana mit petute chawimawina hun 'Eye Donation Fortnight' hi hman ṭhin a ni a, chu chu 25th August aṭanga 8th September hi a ni. He mi hun chhung hian Mizoram Eye Bank pawhin hmun hrang hrangah awareness campaign neih ṭhin a ni.

Mitthi tawh, midangte tana mit petute kha tel thei tawh lo mah se an chhungte hnenah chawimawina leh ngaihlutna Certificate hlan ṭhin a ni. He Eye Donation Fortnight lo chhuah dan chu hetiang hi a ni; India ram Prime Minister hlui boral ta, Rajiv Gandhi leh a chhungten mitdel khaw­ngaihthlakzia leh lainat­awmzia hriain kum 1985 khan mitdelte tan an mit an lo pek tawhna aṭanga lo irh-chhuak a ni a, kum tin he fortnight hi Mizoramah pawh hman ṭhin a ni ta a ni.

Mihring taksa bung ṭhenkhat hi mihring taksa vekin a thlak theih a; chung zingah chuan Mit (Eyes) pawh hi a tel a ni. Taksa dang thlak dawn chuan a petu thisen leh a peka thisen inmil kher nih te a ngai a, thil dang pawh ngai a awm mai thei; chuvang chuan taksa peng dang pe tur chuan a buaithlak bik a ni. Mit erawh chu chutiang chu a ni ve lo, thisen inmil nih kher a ngai lova, laina hnai nih a ṭul hek lo. He mi a nih avang hian mit thlak hi taksa dang thlak aiin a hlawhtlinna a sang bik.

Kan dam laiin kan mit hi mitdelte tan kan pe thei a, kan dam laia pek nachang kan lo hre lo palh a nih pawhin kan thih veleh kan chhungte remtihna in kan pe thei bawk. Kan chhung leh khat hnaivai emaw, kan ṭhenawm khaw vengte emaw, kan hmel hriat boral an awm pawhin an mit kha mitdelte tana pe turin a sawi hmuh theih bawk.

Khawlai a ni emaw, mahni in a ni emaw, dam­dawiin a ni emaw, ruang awmna hmun apiang­ah mit hi lak nghal mai theih a ni. Damdawi­ina lak kher a ngai lo.

Mit pe tur chuan mi an thih/ hnukchah aṭanga chhiar a darkar 6-8 chhung a mit chu lak hman ngei tur a ni. Tunlai thiamna sang zelah mit pumpui hi lak ni tawh lovin, mit pawnlang fim lai (Cornea) chauh lak ṭhin a ni a, mitmu dang zawng chu a awm ngaiin a awm tho a. Mitthi hmel­ah hmuh hreawm emaw, danglamna emaw engmah a awm lo. Mit pawnglang fim tlemte chauh lak a nih avangin a lak chhung pawh minute 10-20 vel lek a ni.

Mit pe tur hian....

1. Kum bithliah a awm lo; tu pawhin kan pe thei.

2. Thisen inmil a ngai lo.

3. Tarmit (eng chi pawh) vuah ṭhin te pawn an pe thei vek.

4. Zunthlum veiin an pe thei a, zunthlum avanga mitdel an nih pawhin an mit darthlalang a ṭhat phawt chuan a hman tlak vek tho a ni.

5. Thildang eng emaw avanga khaw hmu fiah lo an nih pawhin an mit darthlalang a ṭhat phawt chuan an pe thei vek.

Kan taksa ṭawih chhe mai tur leh phum bo mai tur hmangin kan thih hnuah midang tan mal­sawm­na kan la ni thei a; Kristian te tana tih awm tak ni pawhin a lang. Kan nitin hnathawhnaah hian mitdelna thlen theitu chi hrang tam tak a awm.

Tuna mit var nei nia inhriate pawh kan hma lamah eng nge lo thleng dawn tih tumahin kan hre lawk lo, mitdel dinhmuna ding thei vek kan ni. Hawh u, kan mit ṭawih chhe mai tur hmang hian midangte tan thih hnu malsawmna thlentu nih i tum ṭheuh ang u hmiang.

Hre chiang duh leh be pawp duh tan:

Mizoram Eye Bank,

Civil Hospital, Aizawl

Ph:9436354701 / 2324564

Email:mizeyebank@gmail.com

- C. Rothuamliana Mizoram Eye Bank