Mizoram Public Service Commission hi...
Mizoram sorkara thawk tur hna sang group - B chin chu, MPSC hian exam leh interview buatsaihin a la vek ṭhin a, hei hi Mizoram sorkar thuchhuak pawh a ni.
India ramah chuan Union Public Service Commission hian sorkar hna sang zawng zawng chu a la ṭhin a, exam fees hi a tlangpuiin keini (Schedule Tribe) te chuan kan chawi ve ngai lo a, kan chawi pawhin Rs 100 aiin a tam ngai lo. UPSC hnuai chiahah hian Staff Selection Commission a awm leh a, hetah pawh hian Schedule Tribe te chuan kan chawi ngai lo a, free exam a ni ṭhin.
India rama hnaruak ngah ber ṭhin kumtin a mi tam tak la thar ṭhin Banking Sector lamah pawh hian General ten Rs 600 te an chawi laiin, keini Schedule Tribe ho chuan Rs 100 chiah kan chawi ṭhin a ni.
Hmanni chu State dang Public Service Commission kan enkual thuak thuak a, exam fees eng zat nge an chawi ve ṭhin tih te, Assam Public Service Commission chuan exam fees-ah hian:- Gen - Rs 300, ST/ SC - Rs 150. Tripura Public Service Commission - Gen - Rs 200, ST/ SC - Rs 150. Manipur Public Service Commission. Gen - Rs 300, ST/ SC - Rs 150. Hetiang hi state dang sorkar hian exam fees an lak dan tlangpui a ni. Mizoram Public Service Commission ve thung hian ST tan hian Rs. 270 exam fee-ah a la a, a inthlau hle in ka hria, state dang nen a khaikhin chuan. State dang ngaihtuah chuan Mizoram sorkar hian a la hnem mah mah niin a lang!
Hetiang zat a lak zel chuan, 'Hna zawngtute' tan hna dil chu thil harsa tak leh pawisa tam tak chhehrelhna a ni zel dawn a. Hna zawngtute hi sum thawh chhuah la nei lo, nu leh pa leh chhungte aṭanga pawisa hmu ve mai mai ṭhin an la nih deuh vek a rinawm bawk.
Keini lo chhut ve danah chuan exam a buatsaih hian MPSC hian sum tam tak chu exam thil atan hian a senral a rinawm lo. Hna (post) tlem la tur pawhin mi tam takin an dil ṭhin a, sum tam tak hi sorkar hian a ei ngei chu a rinawm a, he pawisa hi Mizoram develop nan an hmang ṭhin nge, a nih loh pawn exam paper check-tute hian sum tam tak lo chuan an check peih lo zawk nge? Christian ram lo, state dang pawn an tih theih chuan kan ti ve thei dawn lawm ni? He sum hi hna thawh mumal nei lote pawisa, hna an duh vanga dil an ni si a. Sorkar department ṭhenkhat phei hi chuan sum siam nan hna advertised (chhuah) hi an hmang emaw tihtur a ni. Sorkar hian bituk a nei lo nge ni?
Hmanni deuhah pawh Bank pakhat chuan post ruak 15 vel hnawh khat turin hnaruak a chhuah a. Exam fee-ah Rs 260 an la a, mi 2000 chuangin an dil an ti a, khang sum te kha eng atan em em nge an tih ni!
Kei aia hre zawk tam tak in awm a, thil titheite beng hriatah sawi chhuak ve hrim hrim teh ang, a hre zawkte kaih harh nan.
- VLMS Dawngkima