Ngawl vei awm khawm mai kan ni em?

He thu dik awm­sa midangte-a kan hmuh mai theih ṭhin mahni erawh kan inpuh mai phal ṭhin loh hi i chhut chiang teh ang u. Mizote hian ngawl vei hi kan awlsam bik emaw tih mai tur ni hian ka hre ṭhin a, a hmingin dawr chhe te kan siam ve a, regular taka kuhva ei ṭhin te, sikret eng chi emaw pai reng te, sahdah hmuan reng ṭhin te kan lo ni deuh vek mai.

Sikul naupangte pawh an bang bik hauh lo, sikhar nghei thei lo pawh an tam ta in a hriat. Ngawl vei theih zingah hian zu leh drug ngawl veite hi an langsarin an hautthlala deuh bik a, an sim pawhin a tlai hnua sim an ni duh khawp mai.

Ngawl vei azawnga hlauhawm ber tisa leh thlarau thlenga pawi pha Bible-ah kan hmu. Bible chuan, ‘sum ngawl vei chu sual tinreng bul a ni’ tih min hrilh. Kan ramah sum ngawl veiin a hrinchhuah chu corruption hi a ni. Sawrkarna changtu party apiang corruption-a an rinhlelhawmna laiah puhmawh an ni a, sawrkar liam ta MNF kha corruption tam tak karah mipuiin an hnawl ta kha a ni a.

Tuna Congress sawrkar pawh hi an fihlim lova, corrup­tion a zung nen phawia phoro ngam rual an ni lo. Kan rama corruption ti nasa thei ber te hian an thar rah an ei ru mai a ni lova a chi tuh tur aṭangin an ei ta ṭhin a, chuvangin hmasawnna ruhrel ṭha a awm thei lo a ni an ti ṭhin.

Entir nan kal­kawng siamna tur PMGSY etc kha eiruk ṭhen a ni a, kalkawng ṭha neih a harsa hle ang. Lalna leh thuneihna ngawl veite hian an hmang sual nasa ṭhin a, kan Mizoram zim teah hian lalte chauh ni lo an chhungkua hnaivaite chena mi hausa a sawi theih an awm ta nual mai. Chu mai piah lamah sawrkara thuneitu lu ber te hi chhungkhat inhnaivai takte an ni duh khawp mai. Hetiang dinhmunah hi chuan Israel Lal Jeroboama II hun lai ang khan venthawn tur awm lo khawpin duhamna a kal thei a ni. ‘Miretheite lu chunga vaivut tak­ngial pawh an it’ a ti a ni.

Lalna leh thuneih­na ngawl vei hi a na hle tih chu kan ram pawl leh kohhran inrelbawlnaah te hriat tur a tam. Kohhran leh pawl ṭhenkhat kehchhiat chhan ber pawh ngaihdan inan loh vang phnenah lalna leh thuneihna inchuh ruk vang a ni duh khawp mai. Chu miin a ken tel lang lem lo chu sum a ni zel bawk. Politician-te zingah lalna leh thuneihna ngawl vei avanga pawisak nei lo, ram leh hnam tlukchhiat theihna leh chimralna (assimilation) pawisa phal lova vote an hmuh tam theihna a nih dawn phawt chuan huang zauh zel duh pawh kan awm ta zel a nih hi.

- C. Chhuanawma, Aizawl S-I