Mizoram tan zirna kalphung thar

Mizote hian lehkha zir kan uar a, lehkha thiam pawh kan tam. Kan pi leh pu, nu leh paten fate fuihna a ‘Lehkha zir ṭha rawh, chuti lo chu i puitlin hunah kuthna i thawk mai ang’ tia kan lo fuih ṭhinna avanga lehkha zir uar ta viaute pawh kan ni ang. Zirlai tam zawkte chuan lehkha zir zawhah sorkar hna thawha office a ṭhu a, hahdam taka eizawn hi an tum ber a ni.

Amaherawhchu, sorkar hnain min daih seng tawh si lo a, tunah chuan unemployment problem hi buaipuitham a ni chho ta mek a nih hi. Chutihlai chuan kawng dang a awm chuan loh avangin zirlai tam zawk chuan BA, MA, B.Sc, M.Sc, M.Com etc. zir an tum deuh vek mai. Admission tih hunlai chuan College leh University zirtirtute’n sawipui beiseite phone call chhan sen mang loh khawp an dawng ṭhin.

Mizoram University hnuai­ah hian kum tin zirlai Master Degree (MA, M.Sc, M.Com, MBA) pass 600-700 rual vel an chhuak ziah a; kum khatah College zirlai mi 3000 velin BA, B.Sc., B.Com etc an zo ṭhin. Kum 5 chhungin graduate mi 15,000 velleh Post Graduate 3500 rual vel an awm angin a chhut theih ang. Tin, University dang aṭanga pass chhuak ṭhahnem tak an awm bawk ang. Heng zirlai pass chhuakte tana hna vanzia chu tumahin hrilh kan ngai tawh awm love; mahni thiamna ang phu tawk hna hmu lo kan tam ta hle a nih hi.

Education vs economy

Lehkha thiam tamna state kan nihna hian ei leh bar dinhmun a chawikang teh chiam lo niin a lang. Lehkha thiam tamna state ni si India rama state rethei ber pawl nih reng mai hi chu thil inkawlkalh leh inhmeh lo tak a ni. Kan dinhmun enin kan lehkha thiamnate sum leh pai, hausakna a chantir tur chuan kan zirna kalphung (education system) hi kan thlak danglam hle chu a ngai tawh niin a lang.

Sapṭawng kan ngaisang a, ṭul pawh a ṭul, central service leh hna danga lut turin sap-

ṭawng thiam a pawimawh hle a ni. Mahse, tun hnai kum engemaw ti chhung chu central service a lut kan awm mumal ta lo a nih hi, tuna kan zirna kalphung leh zirdan hi hna sang lam lut thei khawpin a ṭha tawk ta lo em ni ang? A nih loh pawhin zirlaite an taima tawk loin an tumruh tawk lo pawh a ni thei ang. Zirlai thiamthei falte hi central service leh hna sang danga lut thei tura kan buatsaih a ṭul hle. Chutihrualin a vantlang hnuailam (below average students) te hi chu eizawnna kawng dang atan training pek ni se.

Entrepreneurship development

Sorkar hnain min daih sen loh avangin eizawnna danga mahni kea ding thei tur leh private company/ industry a hnathawk thei tura zirna kan uar a ṭul hle tawh a ni. State sorkar pawhin heti lam zawnga ngaihtuahna senga ke a pen a ṭul hle.

Kan kalphung thlak a, zoram ṭhalaite mahni kut kea ding thei tura eizawnna kawng kawhhmuh leh kaihhruai (entrepreneurship & skill development) hi uar a ṭul ta. Ṭhalaite mamawh eizawnna kawng hrang hrang- Food processing, Animal Husbandry, Horticulture, Nur­sing, Hospitality & Touri­sm Management, Sports, Auto­mobiles Engineering, Fashion Technology etc. zirna lamahte nasa zawka hmalak ni se. Tin, industry leh company chang­tlung zawkte Mizorama din a nih hun chuan nasa takin hna thawh tur a pung thei ang.

Ṭhangtharte tana hnahmuh awlsam zawkna kawng- skill development/ job-oriented education-ah hian sorkar leh Political Party te pawhin ngaihtuahna an seng mek niin a lang. Chung zingah chuan MNF Party-in SEDP hnuaia Man-Power Development Policy a duan hi tihhlawhtlin chhoh ngei atan a ṭha hle. He policy-in a tum chu ṭhangthar/ zirlaite kan chher chhohna kawnga kan zir dan kalphung thlak (paradigm shift) a ni.

Mithiam zawkte pawhin helamah hian ngaihtuahna sen a ṭul ta hle. Tun ang renga kan kal chuan lehkha thiam hna hmu lo, mi beidawng kan chhuah hnem lutuk dawn e.

- Dr. F.Lalnunmawia