No fail policy tihtawp tum hi
Vanglaini July 23 & 24, 2017 chuak, phek 4, column khatnaa sorkarin ‘No Fail Policy’ tihtawp a tum tih kha ngun takin ka lo chhiar a, sorkar pawh hi a va ṭhangharh har ve maw!
Kan lo hriat dan chuan pawl hniam lam, Primary leh Middle Section chinah chuan kum tawpah fail a awm tawh dawn lova, remedial-te neih zel a ni dawn tih lam hawiin kan sikul thuneituten thiam taka an sawi ṭhin. Hun a lo kalzel a, competitive exam han hmachhawn tur meuh chuan an thiamna a lo sawngnawi tih tlai khawhnu-ah kan hre ve ta.
Sorkar laipuiin hetiang policy a han duan hian keini, chawmhlawm state chuan a dik a dawk thlu lovin kan lo pawng sahuai thing vawn ngawt zel a. Kan naupangte lahin an fail dawn lo tih an hre chiang bawk a, in lama han zir ngar ngar pawh an nei ta vak lo a, ‘No Fail Policy’ zet hi chuan kan ram zirna a tichhe vek zawk niin a lang.
Hetih ruala la veiawm em em chu ‘No Punishment Policy’ hi a ni. Kan sorkar sikul zirtirtu tam takte hi chuan an sikulah naupang hrem loh tur tih hi an puangzar nasa bawkin a lang. Hetih vang hi a ni ang chu kan naupangte hian ‘min hrem dawn chuang lo’ tih ngaihdan hi an lak len viau ni.
Sikul ṭhenkhatah phei chuan an zirtirtuten naupang an lo ben deuh pawh an nu leh paten an complaint hlauvin an headmaster-te hial hialin an nu leh pate hnenah ngaihdam an dil e te zuk ti a! Hetiang a nih ngat chuan kan naupangte kan duh anga kan hruai a, kan kilkawi theih loh chuan ram ropui in thlentir chu a va har dawn tak em!
Policy pahnih kan sawi ta a, heng policy te hi thingtlang sikul lamah chuan kan sorkar sikulte hian eng emaw chen chu an zawm ṭha a, tihlaiin kan private sikulte leh kan mission sikulte hi chuan a full-in an zawm lo deuh chuan a lang.
Kan sorkar sikul tam berte hian ‘No Fail Policy’ hi an zawm ṭha a, ‘Remedial Exam’ tih lam hi an ngaihthah leh lawi si a, hei hi zirnain a chhiat phah chhan lian tak chu a ni awm e.
Fail awm tawh lo tura sorkarin he dan a duan chhan ‘unit test leh summative exam’-te hi an ngaih thah leh lawi si a. Heng exam a, fail ang chite chu remedial class neihpui hi kan zirtirtute tih tur a ni.
Sorkarin a duan ang thlap hian kal thei ila thil ṭha tak a ni ngei chuan a rinawm a, mah se kan zirtirtute inpekna hian a tlin pha lo deuh niin a lang. Chuvangin, ‘no fail policy’ sorkarin tihtawp tuma Parliament hiala Bill a pulut tur hi i lo welcome vek ang u.
Tihrualin pawl hniam lama ‘no punishment policy’ kan hmang tlat pawh hi en chian ni se, sorkar hian a titawp turin hma la ve nghal se. Naupangte future thlir ranin sorkar laipui hi kal zel teh se.
- Patrick Z, Chhingchhip