An sawi Champhai lamtluang
Champhai kawng chu ka han zawh ve leh a, a lo chhe zual ta hle mai. Zemabawk dai aṭangin a chhe ṭan mai a, Seling thleng tur pawhin darkar hnih a ngai ta.
Tuivawl ruam phei chu, hman ni lawka inkal chhâwk ngai khawpa buaithlak kha a ni bawk a, truck täl buai pakhat kan tawng hlauh bawk nen, darkar khat lai kan táng. Dulte pelh aṭang chuan a ziaawm hret a, mahse a kawng dung tluan hian a hahdam lo hle mai. Kan dâk awrh awrh a, kan bu ngawih ngawih a, kan sawt ṭawk ṭawk a, motor chung tawng dawt a hlauhawm thei hial ṭhin.
Buaithlak deuh chu kawnga tui tling, a thûk dan hriat theih loh, hêlna awm chiah si lo hi a ni. Hmun tam takah hetiang hi a awm a, dai ngei ngei a ngai si a, ip chawih chawih a ngai reng mai. Mutthlûk rual a ni lo. Lâ a tla mai ang tih a hlauhawm kawng tluan mai a ni. Darkar 10 tling lova thlen tum ila, ṭan fe a ngai ang. Tun hma aṭangin Champhai kawng hi zin kawng nuam a ni lo ve hrim hrim a, khua a khát a, luipui leh tlang chhipa khua a inthlâk a ni mai a, kawng a zim bawk si a, mahse tun ang êma a chhiat hma kha chuan ziaawmah a la ngaih theih. Tunah chuan a chhiat dan hi a namai ta lo a nih hi. Khualzin motor neitute leh a veivâkte an khawngaihthlak hle mai.
Kawng sir tawn tawn a hnim lutuk bawk a, kawngchhak leh a thlang lama hnim sang deuh ho hi motor chung lawkah an inchibai hnuang hlawm mai a, hei hian kawng a tizim zual a, a ṭhenah chuan hnim gate chhunga lût te pawh kan ang.
Hnim karah lehlam aṭanga motor lo kal nena inbarakhaih thut a hlauhawm khawp mai.
Kawng ṭha hi kan thil ngaih pawimawh zingah a tel lo a ang ngawt mai. Kan ngaihsak khát riauin a lang. A chhiat zual lutuk hmaa chul mam (annual maintenance emaw) te hi a theih loh em maw ni? Kawngpui ṭha hi hmasawnna chhinchhiahna chi khat a nih chuan, keini chu kan la hnufual fe zawng a ni phawt mai.
- RK Lianzuala