Ruihhlo na zawka do a ṭul leh ta

Kan rama tlawmngai pawl lian ber hruaitute kal khawm chuan ngaihtuahna hrang hrang an sên hnuah tun hnaia kan rama ruihhlo, a bikin heroin hluar ta lutuk hi veiawm an ti a, nasa zawk leh chak zawka do tur pawl Central Anti Drugs Squad (CADS) an din leh ta rup mai.

Kumin bik han thlir ta ila, Excise department leh Police ten heroin leh ruihhlo dang an man thu ni tin deuh thaw report hriat a ni ta hi a manganthlak hle. Kan ṭhalai tam tak kawtlaia inzui dûl dûl, ruihhlo ti tih hriat ngawih ngawih an tam ta lutuk hian kan khawtlang nun eng chenin nge a la nghawng zel dawn tih hi kan ngaihtuah a ngai ta hle a ni.

Ruihhloina min chîm buai meknaah hian a do turin kan kohhran hruaitute pawh an bâng bik lo. Khawvel ngaiha sual leh ruihhlo ngaite chhan chhuak tur hian Biak Ina inkhawm a, pulpit tlang aṭang ringawta siam ṭhat leh tihharh theih chi kan ni tawh lo tih kan hriat thar a hun ta hle mai.

Central YMA Presdient chuan ruihhhlo do chu thil châkawm tak a nih loh thu a sawi a, chutih rual erawh chuan kan ramin a mamawh si avangin tih a ṭul thu a sawi. Kan sorkar pawhin ngaihtuahna thar sênga a chêt a hun tawh hle a ni.

Tunlaia an sawi lar pakhat, ruihhlo lo luh dan chungchangah hian khaw­chhak lam, Myanmar aṭangin a rawn lut nasa tih hriat a ni a. Khawchhak lama kan Zo hnahthlak unau kan tihte hian kan ram zalên leh thlamuang taka kan awmna hi remchangah hmangin ruihhlo leh sorkar phal loh tawlh rûkna kawng remchangah min hmang ta mai zawk niin a lang ta.

Myanmar sipai sorkar buai avanga kan rama rawn raltlânte zingah raltlan chhuanlama ruihhlo rawn keng lut an tam hle nia sawite a la awm bawk nen, hetiang teh nuaih maia kan awm hi a fel dawn lo. Chuvangin, ruihhlo do tura na taka hma latu hi chu an awm a ngai reng a ni.

Kan Central YMA hma­laknaa ruihhlo kan do turah hian fimkhur tak si, dan hrûlah awmze nei tak siin kal tum ila. Kan sorkar dan leh thupek kengkawhtu lamte pawhin thawktu indaih lo tia chhuanlam siam reng loin, ruihhlo do kawnga tlawmngai pawlte hmalaknaah hian ṭha takin inṭawiawm tawn thei se. Kan ram hun tawn mek, ruihhloin kan ṭhalai tam tak a tihbuai mek hi kan tirêm vek thei lo a nih pawhin, a kalkawng tal hi chu kan chhut chah a ngai a ni.

- Lalnunzira Chawngthu