Thil dangah hian sum a awm lo em ni?

Congress hun laia hnianghnar taka kan hmuh chu Chief Minister leh a nupui inzui kha a ni e, an ti ṭhin. Tun hnaia MNF hunlaia hnianghnar taka kan hmuh chu Mau leh raw supply thu a ni a, chu bakah Chief Minister leh Sports Minister inzui kan hmu fo bawk. Hei hi sawisel tur a ni hran lova, sum kan neih loh an sawi laia ṭul lo thleng thlenga sports lamin kan pawisa a pawt a nih erawh chuan kan swisel chauh tur a ni ang.

Tun hnaia kan hmuh chu Mau/Raw chi supply chung chang a ni. Mizoram sorkar hian mau/ raw chi supply na atan cheng nuai 450.14 lai a seng tawh an ti a, a supplier hi a tirah khan pakhat thlan a ni a, a aia tam an thlan hnu pawhin supplier pakhat chuan supply hi a chang zel tho a, a lo specialist viau a ni ngei ngei ang.

Mau chungchang kan sawi mek a, a chi manah cheng nuai 450 kan seng tling ta a, mau/ raw hralhna aṭang hian eng zat nge kan hmuh let? Mau leh raw supply na tura sum kan neih chuan thil dangah pawh a awm ve tho tur a ni lo vem ni?

Phullem kan hmuh zozai te hi hma­sawnna a nih kan hai loh rualin thil danga hman tur pawh pen niin an sawi a. Sawrkar laipui, Ministry of Mino­rity Affairs hnuaia Pradhan Mantri Jan Vikas Karyakram (PMJVK) hnuaia pawisa awm hmangin phullem kan phah ham ham a nih chuan PMJVK hmanga zirna siam ṭhat hna, health infrastructure siam ṭhat hna state dangin an thawh sup sup ang hi chu kan thleng ve zo dawn lo.

PMJVK hnuaia pawisa awm hmanga phullem kan phah zel chuan hriselna kawngah leh zirna kawngah kan la hniam a nih pawhin kan pawisa hman duhna (priority) a dik loh vang a ni thei ang em?

Covid-19 vanglai khan Health depart­ment Dr R Lalthang­liana enkawl kha an audit thut a, kha kha audit hmasak ber niin a dang department pawhin an zui zel dawn emaw tia kan nghah laiin Health department chauh kha an target bik tih tunah hian a lang ta.

Audit ngai khawpa a awm a nih chuan Health department hian thiam loh an nei a nih loh pawhin tute emaw chuan thiam loh an nei a nih rinna hi tun thleng hian a la awm chhunzawl ta zel a ni.

Engpawhnise kan pawisa hmanna hi chu kan duh zawngah leh kan ngaih pawi­mawh lamah a ni ṭhin a, kan sorkar sum hmanna en hian thil dangah hian sum a awm ve lo em ni le?

- Jimmy Lalmuanpuia