CHHUNGKUA HI KAN NGAIPAWIMAWH EM?

Mithiamte chuan chhungkua hi khawvela engkim bul lo ṭanna a ni an ti ṭhin a. School hmasa ber, damdawiin hmasa ber, sorkar tê ber ti tein an lo sawi ṭhin. Hei hi a dik hlein kei pawhin ka hria a. Kohhrante pawh hian Kristian chhungkua chung chang inzirtirna hi kan nei nasa a, a sâwt pawh a sâwt viau a, mahse, chu lam lungkham lem lo, chhungkua aia ngaihpawimawh zawk nei Pa leh Nu te an la kat nawk tho mai a. Ram hruaitu ṭha, politician ṭha nei tur pawhin a pawimawh leh bulṭanna hmasa ber chu chhungkua a ni tlat a ni. Nu leh pate'n in chhungkhura kan thusawi leh ṭawngkam hnih khat hi keini'n kan hriatreng tawh lem loh pawh kan fate hian an lo chhinchhiah hle ṭhin.

Nu leh pa tam tak chu khawtlang, NGO leh political party-ah te nihna chanvo ṭha tak tak chelha mi ṭul takte an ni ṭhin a, an ṭangkai em em bawk. Chutih laiin chhungkaw lam kha a lo kawrawng viau thei tlat mai. Kevin miller, author leh editor ni bawk chuan a lehkhabu pakhatah tihian a thutlukna siam thu a sawi a. "Kum tam tak kaltaah khan Kristian Pawl lian tak pakhat hian Board chairman ni turin min rawn sawm a. Keini ang duang tan chuan thil lawmawm tak a ni. Chu hna chu mi tam tak awh leh thawh châk, hlawh ṭha tak a ni a. Kan chhungkaw dinhmun pawh min chawikangin kan khawsak pawh a zângkhài phah ngeiin ka ring a."

"Mahse, nupui fanau nei ka ni a, ka fate pawh enkawl ngai tak an la ni. Ka nupui ka ràwn ta a. Ka nupui chuan, "Nupui fanau tan tunah pawh hun ka nei tam lo va, chu hna chu sangin duhawm hle mah se, zan tina i phone call dawn turte, Inrinni leh Chawlhnia i buaizia turte chhungkaw tan i fate tana hun I neih loh dan turte kha ngaihtuah la, chu hna chu duhawmin awhawm viau mah se ti lo zawk mai rawh,” tiin min duhpui ta lo a ni. Chutah Pathian ka rawn leh ta a, ka ṭawngṭai a. Pathian chhanna chu tihian a lo thleng ta a ni. “I nupui fanaute hmangaih la, ṭha takin enkawl ang che,” tih hi a ni," a ti a ni. Kevin-a ang mi hi kan tam lo hlein a rinawm a, mi ngaihsanawm tak a ni. Keini chuan chhungkua lam ngaihtuah miah lovin, khawtlangah, pawlah leh kohhran thlengin nihna kan chuh zawk emaw tih tur a ni.

Nakkum lawkah inthlanpui kan hmachhawn leh dawn a. Hmanlai kan pi leh pute khan nupui pasal innei turte chu an chhungkaw chanchin leh thlahtu lamte an lo inchhuiin an lo fimkhur thei hle mai. Hnam fing hmasa leh upa zawkte ngei pawh hian mi lar leh ropui tak takte, ram hruaitute pawh hi an chhungkaw ṭobul (Family background) an lo chhui viau ṭhin bawk. Keini pawh hian kan ram hruaitu atan hian kan thlan turah kan fimkhur hle a ngai a ni. Pawisa nei leh lehkhathiam sang deuh emaw, huhang ngah deuh ringawtte hi ram hruaitu atan an ṭha ber ang em? tihte pawh hi kan ngaihtuah a pawimawh hle. Ram hruaitu ṭha turte, hruaitu ṭha turte hi a ṭobul chu chhungkua aṭangin a inṭan fo ṭhin.

Fate puitling tawh leh, ngaihtuahawm an nih tawh loh hnuah chuan lo inhmang pawh ni ila thuhran a ni a. Chuti ni lo va, chhungkua enkawl hman lo léka fate tan pawh a hun nei thei lo va, thil danga kan phibuai ṭhin hi a pawiin a ṭha lo tak zet a ni. III Johan 3:4 ah chuan, “Ka fate thutaka an awm tih ka hriat a liama lawmna nasa zawk reng ka nei lo ve,”a lo ti a. Kan fate'n Pathian thutak an zawm leh an awih tluka hlu hi khawvelah a awm lo. Lehkha thiamin, hausa hle mah se, an nun an hloh tawh chuan lawmman tur reng a awm lo ve. Tunlaiah ṭhalaite zingah ruihhlo a hluar em em ta mai a, an thlarau leh an nunna an chan hi a va pawi ṭhin tak em! Kan fate tana hun kan pek tlem lutuk avangin kan fate hian ṭhian an mamawh a, ṭhian sual an kawp a, in chhung nuam an ti lo va, sual kawng thuk takah an pil mek a ni.

Pawisa chu ngahin in leh lo ṭha pui pui nei mah ila, chhungkua kan hlim loh chuan khawvel hi a nuam thei lo. Chhungkua hi i ngaipawimawh ang u.

- Reuben Lalnunthara Hnamte