Ruihhlo do kawngah CYMA a beidawng

Mizorama ruihhlo do kawnga thawh hlawk ber Central YMA chuan tunlai hian ruihhlo do kawngah beidawnna lian tak a nei a, sorkar, kohhran leh pawl hrang hrang aiawhte punin a mangan thu a puang a, core committee din a ni ta hial mai.

Central YMA hi Mi­zorama Mizote huap zo ber pawl ropui leh rintlak a ni ṭhin a, a la ni reng bawk. Hun rei tak ruihhlo a do hnuah a kaw tawpah a ṭan hun a lo thleng ta a ni.

Kum 2004 aṭang khan Mizorama ruihhlo lo lut dang turin supply reduction service (SRS) din a ni a, chuta ṭang chuan hming hrang hrang vuahin ruihhlo zuarte man a, dan anga hrem tura thuneitute kutah an pek an tam tawh hle. Ruihhlo ti ṭhinte vaikhawm hna thawkin theihtawpin an thawk a, ruihhlo vanga thi mai tur nunna tam tak an chhan a ni.

Kum 13 dawn tha thlah loa ruihhlo an dona kawngah hian sorkar, kohhran, pawl leh mimal pawhin sum hmangin an pui ṭhin a, hei hian an hna thawhnaah kawngro su viau mahse awmzia a awm nei thui lutuk lo. Ruihhlo ngaite pualin vawi riat lai camping an buatsaih a, chutah chuan mi 1500 zet lutin mi ṭhenkhat an ṭha chhuak a, a tam zawk erawh an nun hlui lamah an kir leh hlawm a ni.

Central YMA hian beidawnga chawlhsan erawh a ngam bawk si lo. Tunah phei chuan zirlai naupangte'n ruihhlo chi hrang hrang hi an ching thar hle.

Hun khirh a tawh mek vang hian chawlhsan ai chuan sorkar leh kohhran te nen inrawn tlan a rawt ta a, August 4, 2017 khan NLUP conference hall-ah an kal khawm a, Chief Minister hoin, Home Minister, Finance Minister, Social Welfare Mi­nister, Health Minis­ter-te bakah Police Lal, DGP, IGP; Ex­cise & Narcotics Commissioner te, a kaih­hnawih department aiawh leh MKHC aiawhte an tel a ni.

Kha huna CYMA president te, vice president leh general secretary-te thusawi leh report aṭang khan sorkar, kohhran leh Zoram mipui ṭanrual a ṭul ta takzet tih a hriat a ni. Kha hunah khan CM khan core committee din a rawt a, chumi zulzui chuan CYMA chu action plan siam turin he inrawn­khawmnaah hian nemnghet nghal a ni.

CYMA-in ruihhlo a dona kawngah hian sum an dawn pawh a tam mai, a hmanralna lam a hautak viau bawk a, mah se sum hi a indaih lo reng tho a ni. Heta rilrua lian ber chu kohhran hi sum lamah tun ai hian thawh hlawk se, kohhran mipui thawhkhawm aṭang hian a Synod lam lam hian budget-ah neih law law se tih chu mi tam tak duh dan a ni.

Central YMA hi beidawng mai lo se, theihtawp chhuah turin kohhran hian ṭanpui ve bawk se. Sum tel loin he sualna hi do hneh theih a ni si lo. Mizo mipui kan ṭan tlan a ngai ta tih hi he beidawnna aṭang hian hre chhuak teh ang u. YMA hi Mizote tan pawl belh tlak a ni si a.

- Lal Rinmawia