Kuhva tawlh rukah CYMA leh sorkar an thawk dun em?
A kum tel kan lo buaipui tawh kan thupui chai rawn Myanmar aṭanga dan lova kuhva tawlh ruk chungchang hi ka lo chik ve neuh neuh a. Political party pakhat hian kuhva tawlh ruk tih tawp hi an hreh viau mai niin a lang. Mithiam leh dik nia kan lo hriat ṭhinte pawh an chhung te, an ṭhiante leh an lam hnai kuhva tawlh ruka inhnamhnawih an awm chuan an chhan duh tlat ṭhin te hi a mak ngawt mai.
Heng zawng zawng aia la mak leh zawk chu Kuhva checkgate siam rawttu Central YMA ten CM meuh hmaa sorkara Kuhva chhiah tihhniam an dil kha a ni. Nikum khan Central YMA OB chuan CM Zoramthanga hnenah dan loa kuhva tawlh rûk danna turin checkgate mumal tak siam turin rawtna an thlen a. Chief Minister chuan, Myanmar aṭanga Mizorama dan loa kuhva tawlh rûk tihtawp a duh thu a lo hrilh ve bawk a ni.
Central YMA-in CM-a an thu thlen pui ber chu khawchhak lam aṭanga dan loa kuhva tawlh rûk tihtawp chungchang a ni. Kuhva tawlh rûk danna tur hian MNF sorkar chuan Sairang leh hmun dangah te Kuhva check-na an han siam leh vel ta kha a nia.
Khatia an siam hnu khan kuva a kal tawh loh thu hriat tur a awm lo a, an check gate siam belh hian duty na hmun a ti tam sawt thung.
Hun a kal deuh a, Myanmar kuhva lo lut dan duha gate te pawh siam belh tura sorkar nawrtu YMA bawk chu kum pawh a vei fel hmain kuva chhiah tihhniam duhtu pawl an ni ta daih mai nia!
CYMA bawk hian kumin May thla khan kuhva tawlh ruk chungchangah CM an kâwm a, ram dang aṭanga kuhva rah lak luha chhiah lak tihhniam an rawt leh daih thung.
Kum 2022 May thla a nih meuh chuan CYMA hian kuhvaah dan anga sumdawnna a kal theih nan chhiah lak (tariff rate) Basic Custom Duty 40% chu 20%-a tihniam tura hmalak an duh thu CM hnenah bawk an thlen leh ta si a ni.
Hetianga CYMA meuhin a thu zuka Myanmar kuhva rawn luhna remchang a zawng hi hriatthiam a har ka ti a. MNF sorkar leh CYMA hi Myanmar kuhva lak luhna kawngah hian an ṭang dun ta a ni ber em?
- Vohbika Pu