“INDIGENOUS” HRILHFIAHNA LEH MIZORAM MAMAWH DAN ṬHA

Nitin chanchinbu Vanglaini ni 4.8.2017 a chhuak phek hmalamah ‘Indigenous hrilhfiah chiam dan a awm lo’ tih Law & Judicial Department hotuten Vanglaini palai zawhna an chhannaah an sawi thu te, Indigenous tih chu hrilfiah leh chuan dan vak a awm loh thu te, UNO pawhin a hrana hrilhfiahna a nei lo tia an sawi thu leh khawvelah Indigenous tih hrilhfiahna hran siam a ni lo tih an sawi thu te tarlan a ni a. Hemi bakah Law & Judicial Department hotute chuan MZP te duh dan anga Indigenous hrilfiah vak theih a nih loh thu leh khawvel pawhin hrilhfiahna hranpa a neih loh laia duh dan anga lo hrilhfiah ve ngawt hi a dik a rinawm loh thu an sawi bawk.

Hemi chungchang hi Mizoram leh Mizote tan nakin zela thil pawimawh tak leh hnam nun kal zel tur tana pawimawh lutuk a nih avangin ngun tak leh tih takzeta ngaihtuah a ṭul a ni. Mizoram sawrkar department zinga department pawimawh tak kan ram tana Dan leh Hrai pawimawh siam chungchanga mawhphurtu bera ngaih Law & Judicial department-in ‘Indigenous hrilfiah chiam dan a awm lo’ ti lam zawnga chanchinbua tarchhuah a ni ta mai hi a ṭha lovin a pawi em em a. Kan Chakma lam unauten remchanga la in advantage a an hman theih tur niin a lang a, Mizo hnam hnuk khawih thei thil pawimawh tak (sencitive issue) chungchangah hian thu leh hla sawi chhuah hi i fimkhur teh ang u.

He subject/ issue hi Mizote tan thil pawimawh tak a nih avangin ka theih ang angin thil ka chhui phah nual a. Higher& Technical Education Department a Technical Wing hotute leh Law & Judicial Department lam a hotute sawi danin vawiin thlengin sawrkarin Higher Technical Courses zir tur a thlan dan tur chungchangah dan bulpui innghahna tur nghet leh rintak Act siam a lo la ni miah lo mai a. A Principal Act (hemi chungchanga dan bulpui innghahna tur) awm miah lovin The Mizoram (selection of candidates for higher technical courses) Rules siam a ni a, hei hi thil mak tak niin a lang. A chhan chu dan bulpui (Principal Act) awm lovin engtinnge Rules a pian theih? hmeichhe tel lovin mipa in a mah chauhin fa a nei thei lo angin, Act awm lovin engtin nge Rules a pian theih le? Law & Judicial Department hotu zinga pakhat sawi danin “he Rules hi Executive Rules a ni mai e” a ti a, sawrkar dan leh hrai siamna kawnga mawhphurtu bera ngaih Law & Judicial Department hotute hian a dik leh dik lo pawh hre tur ber leh sawrkar pawh finchhuah tur zawk an nih laia hetiang maia Act mumal innghahna tur awm miah lova Rules/ Executive Rules hmangin kan lo kal mai mai ni berin a lang a, sawrkar leh a concerned department official te hian thil kalphung fel tak hre reng chung sia dan mumal tak siam an duh lo zawk nge ni a, mumal vak loa duh dan dana pawh sawih theih tura awm mai mai hi an duh em ni zawk le? Hemi chungchanga tuna hman lai mek Rules hi Executive Rules pawh lo ni ta se, eng dan hnuaia siam nge a nih a, innghahna leh tlawh chhan eng emaw provisions chhete tal a awm tur a nih laiin chutiang innghahna leh tlawhchhan tur engmah a awm si lo a. Phuahchawpin amah leh amahin Rules a lo piang mai niin a lang a, hei hi thil awm lo leh belhchian dawl lo tak niin a lang. Dan mumal leh fumfe tak lo nei thlip thlep ila chuan tun ang hian kan buai lo tur a ni asin maw le.

‘Indigenous hrilfiah chiam dan a awm lo’ tih hi a hrilhfiahna tur ber dan mumal/ dan bulpui (Act) a awm miau si loh chuan hrilhfiah chiam dan chu a awm lo reng a ni. Dan siam kalphung reng rengah chuan Act siam hmasak a nih hnuah Rules-in a zui tur a ni a, Act awm loin amahin Rules a piang chhuak ngawt thei lova, tuna kan sawi lai mek chungchangah erawh chuan Act awm lovin Rules siam a ni ngawt mai hi thil mak tak a ni.

Hemi chungchangah hian Act mumal tak siam lo ni ta se, chutah chuan tuna kan buaipui mek sapṭawng thumal Indigenous (Indigenous people of Mizoram) tih hi a awmzia leh a huam chin tur definition dah luh thlap mai tur a ni. Tichuan, midang hrilhfiah tir tura rawih kual buai a ngai miah dawn lo a, tuma hrilhfiah hran tur ni loin a dan bulpui (Act) ah a definition a awm mai dawn a, chu chu innghahna tur a ni a, midang hrilhfiah tur ni lovin a dan bulpui (Act) in a hrilhfiah chu thu tlinga pawm tawh mai tur a ni. Entirnan - The Wild Life (Protection) Act, 1972 ah pawh Animal tih te, Wild Life tih te a awmzia leh a huam chin tur fel taka ziah a ni a, chutiang zelin dan (Act) hrang hrangah a ṭul dan leh mamawh dan ang zelin thu harsa leh inhnialna awm thei leh thu inchuh awm thei laka inven nan definition mumal tak dah a ni ṭhin.

Tuna kan sawilai mek chungchangah pawh hian Act mumal tak Mizoram sawrkarin vawiin thlenga a la siam lo hi a mak khawp mai. Vawiin thlenga Indigenous hrilfiahna dap kual ngai leh hemi chungchanga kan buaina chhan bul tak, a kaikuang chu Mizoram sawrkar lo ding tawh zawng zawngte ni berin a lang a, zirlai leh mipui lam te hi chu a kaikuang an ni lo zawk a ni tih a lang chiang khawp mai.

Rawtna:

(1) A chunga kan sawi buaina leh harsatna chinfelna ṭha ber tur chu dan mumal tak innghahna tlak tur Act i.e The Mizoram (Selection of Candidates for Higher Technical Courses) Act Mizoram sawrkar hian siam vat se, chumi hnuah a Rules siam zui ni nghal bawk se.

(2) Kum 1986-a MNF leh India sawrkar Peace Accord signed denchhenin, Indian constitution 53rd Amendment lo piangin Article 371 G special provisions in respect of Mizoram dah luh a ni a. He special provision hian a tawi zawnga sawiin kum 1986 hnu lam aṭang chuan India sawrkarin Mizote sakhua, nunphung leh hnam zia etc. leh ram neitu (ownership and transfer of land) kalh zawngin eng dan mah a siam theih loh thu ziahlan a ni a. MNF ngei pawh kum sawm lai an sawrkar chhung leh vawiin thlenga sawrkar mek te pawhin he special provision kan neih chhun hman ṭangkai dan bengsik a ngaihtuah an tum lo leh a nachang an hre lo hi a mak khawp mai. Bible-a kan Lal Isua tehkhin thu sawi, talent khat dawngtu-in tihpun tum lova a ngai ngaia a dah ṭha tlat ang chauh kan ni maiin a lang a, dan te chu a hrilhfiah thiam leh mahni tana ṭha tura pawtfan thiam thiam tan hlawkna a ni mai ṭhin. Mizoram sawrkar hnuaiah Law Commission meuh din ni siin hetiang lama hmalak tumna reng reng awm lo hi a mak a, kan harh chhuah a hun takzet a ni.

(3) Mizoram sawrkarin Legal Draf­ting Committee din thei se. Mizo­ram mamawh leh ṭul dan hrang hrang ṭha tak kan neih theih nan Mizoram sawrkarin dan lama mithiam leh rawntlak turte ruatin Legal Drafting Committee mumal tak din thuai thei se a ṭha ngawt ang.

- C.Lalrinpuii, Zarkawt