Politician te’n bial an zawng nasa!

Nakkum May/ June-a inthlang tur state ṭhenkhat rualin Mizoram pawh kan inthlang ve mai thei tih sawi a tam hle mai. Election Commission of India (ECI) hian General Election hi thla 6 atan a sawn hma thei a, thla 6 atan a pawt fân thei bawk tih kan hre hlawm awm e. Heti a nih chuan Mizoram inthlan hun tur hi sawi thiam a har ta riau va. Mi ṭhenkhat chuan 2019 MP (Lok Sabha) inthlan ruala Mizoram MLA inthlan hi sawn hlat a nih ring pawh an awm a. A mal teh ngâwka Mizoram state tana inthlan buatsaih a nih ring lo an tam bawk.

Kawng lehlamah chuan Mizoram chu hneh taka Congress sorkarna a ni a, District Council pathumah hnehna sang tak an chang vek bawk a ni. ‘Congress Mukh Bharat’ tih thupuia neitu, Central sorkar BJP kaihhruai khuan Mizoram Congress sorkar hi duhsak takin thla 6 atan inthlan a sawn hlat sak a rinawm lem lo. State dangte ruala inthlan tir tura a sawn hma duh mai hi a rinawm thei viau awm e. Independent body, thuneihna hran nei angin ECI te chu kal bawk mah se, sorkar thurawn pawm lo tur khawpin ECI chuan ṭan a khawh duh a rinawm lem lo a. Chuvangin, mawng-vawm-ba ang maia political party-te chu an inbuatsaih hmanhmawh deuh a ngaih na chin a awm thei ang.

Mizoramah chuan Cong­ress leh MNF chu a inbei tur ber an ni leh mai a. Party dang - ZNP, MPC, BJP leh PRISM te, Exodus Movement an tihte pawh, an inhawrkhawma thawhhona forum mumal tak an din a nih loh chuan sorkarna siam tur khawpin Congress leh MNF te hi an hliahkhuh zawh rin a harsa rih hle.

Chutih rual chuan kum 9 hmel hmuin Pu Lal Thanhawla kaihhruai chuan ro a rel ta a. Bial sawn hri pawh a lêng viau mai. An sawi danin Congress MLA 34 zingah, Champhai south bialtu MLA, Pu JH Roṭhuama tih chauh lo chu din tum leh vek nia sawi an ni. Hetih rual hian MNF lamah pawh an vice president, Pu R. Tlanghmingthanga tih loh chu chawlh tum an awm lo a, MLA nih tuma bial zawng leh vek niin an sawi.

MPCC vice president, home minister Pu R. Lalzir­liana hi bial sawn tur zinga sawi rik pawl tak a ni a. Champhai South leh Aizawl West I emaw, Hrangturzo bial nena sawi zawm a ni. Chhim lamah pawh Lunglei South bialtu Pu S. Laldingliana chuan an chenna veng, Lunglei East lamah insawn a tum niin an sawi a. Chief Minister, Pu Lal Thanhawla pawh Serchhip bial bakah, Tuikum bial kawp tura sawi rik a ni. Minister Pu Lal Thanzara pawh Kolasib bial nena sawizawm a ni.

MNF lamah an president, Pu Zoramthanga dinna tur a chiang lo a. Aizawl East-I, Aizawl North-II leh Champhai South te a enkual mek niin an sawi. An senior. vice president, Pu Tawnluia paw’n bial a zawng nasa niin an sawi. Hahchhek bial en reng chungin Aizawl North-I a vil reng tho niin an sawi a, Tuichang (Khawzawl) constituency lam pawh a mitmei reng tho niin an sawi.

MNF vice president, Dr. R. Lalthangliana chuan kum 25 a bial tawh Lunglei west chu a chhuahsan fel dawn tih chiangin an sawi. 1987 kuma a lo tlak tawhna, South Tuipui (Hnahthial) constituency a en phawt niin an sawi a, mah se, Hrangturzo (North Vanlaiphai) bial lamah din tumin a insawrbing mêk niin an sawi bawk.

Aw le, kan politician palian-te hian engati nge bial an zawn chiam chiam mai le, bial hlun neih hi a har viau nge ni ang? State dang leh central sorkara BJP leh Congress, JD(U), RJD, AIADMK, TMC leh party dang dang hruaitute khu chu bial ngai deuh hlirah an ding a, bial ngai khu an chei a ni ber. Bial thlak zut hi kan ṭhatpui ang nge, kan chhiatpui ang? tih hi ngaihtuah a ngai viau! ‘Bial zawng’ an nih pawhin mi dangte dipdal lo zawngin, an dinna tur thlang fel thuai ṭhin se, anmahni leh an pawl tan pawh a ṭhat zawk a rinawm mang e.

- Lalruatzuala