A hmunah Bike intlansiak

JK Tyre - FMSCI National Racing Championship vawi 20-na chu August 5-6 khan Kari Motor Speedway, Coimbatore-ah neih a ni. Mizo rider an chet ṭhat avangin zawhna tam tak ka dawng a, hmarchhak kil khata state lian lo tak, motorsport inelna tur hmun puitling pakhat pawh nei lo leh event pakhat an buatsaihna zat pawh budget nei ve phak lo kan nihzia chu inthlahrung tak, a ruka nuam ti veng veng chung siin ka sawi malh malh a. A ruka nuam ka tih chhan erawh Vanglaini aiawha kal ka nih vang leh, ka Mizo puite ngeiin dawhsana lawn chung ngeia hnehna hlado an chham theih vang a ni.

Hnung lama sa barh

July 28 chawhma lam a ni a, nidanga ka tih ṭhin ang bawkin office ka kâi. Hna thawk tura ka ṭhut hnu lawkah kan Joint Editor Lalnghinglova Hmar chuan “Sports department kha meeting lawk ang" a rawn ti a, rang takin kan kim nghal ṭhap - chutah India ram media 13 sawm bik zinga National Racing Championship a hmuna hman pui tura sawmna kan dawn thu a sawi zui zat a.

Kan sawi ho rei lo, Lazarzova leh John Zothansanga te chuan min hmehbel ta mai a, lawm takin ka pawm nghal thlap. Chutih rualin Vanglaini aiawh tur ka nih dawn avangin insit a na a, kei aia senior pahnihten ka zin chhung zawnga ka hna min lo hmui dawn avangin a inthlahrunawm duh hle bawk. Mahse, ka koah a tla miau a, kal tura ruat ka nih ang ngeiin ka mawhphruhna hlen turin ka inzir bing zui nghal.

Ni hnih inelna

Kumin JK Tyre FMSCI National Racing Championship-ah hian inelna chi hrang hrang LGB Formula 4, Red Bull Road to Rookie Cup, Euro JK 17 leh Gixxer Cup te neih a ni. Mizo telna Red Bull Rookie Cup leh Suzuki Gixxer Cup kha ka beng verh leh ngaihven a ni a, inelna dang chu hmuhnawm tlirin ka tlir liam.

National champoinship-ah hian Mizo tleirawl duhawm tak tak - Lalhruaizela, Lalnunsanga, Malsawmdawngliana leh Lalmawipuia ten podium an lawn phak. Inelna hi ni hnih neih a ni a, round thum neih tur zinga round hnihna niin intlansiak vawi hnih zel an hmachhawn.

Intlansiak chu

Inrinniah intlansiak ṭan hmain ruah a tla a, kawng a huh avangin kum 2003-a siam circuit, 2.1km a thuiah rider an fimkhur hle a, a tir aṭanga a tawp thlengin a hmuhnawm tluan chhuak zak.

Road to Rookie Cup (Kum 12-16) second round-ah hian India ram pum aṭanga rider thlan chhuah ṭha bik 13 an intlansiak. Lap 8 an tlan hnuah Bawngkawn rider Lalhruaizela chu pahnihna a ni a, a hnungah Electric Veng rawlthar Lalnunsanga a thleng bawk. Pathianniah khawṭha tak hnuaiah race 2 neih leh a ni a, Lalhruaizela chu pahnihnaah thlengin Lalnunsanga erawh palinaah a thleng thung.

First round hmasa ang bawkin race 1 leh 2-ah te hian Mizo rider pahnih hmaah Jaden Gunawardena a thleng leh hlauh. Sri Lanka rider Jaden hi Red Bull Cup tlan tura tling sa a nih avangin point pek a ni ve lo a, hei vang hian Mizo rawlthar Hruaizela hian points 38 hmuin table chung berah a awm; September 1-3 hian third round tlan leh tur a ni a, a chesual palh a nih loh chuan India aiawhin Spain-a Road to Rookie Cup qualifying round tlan turin a dinhmun a siam ṭha tawh hle.

Kum 16 chunglam inelna Suzuki Gixxer Cup-ah rider thlan bik 16 an inel, qualifying a pakhatna Malsawmdawng­liana chu lap hnihna an tlan laiin a bike a chhiat avangin a tlan zui thei lo a; pahnihna aṭanga bul ṭantu Lalmawipuia chuan lap hnihna kawng kawiah harsatna tawk mah se podium lawn turin pathumna dinhmun a luah phak.

Pathiannia neih race 2-ah Malsawm­dawngliana’n a hnuhnung ber aṭangin bul ṭan mah se lap riat an tlan hnuah pahnihna dinhmun a luah a, pathumna

aṭanga bul ṭantu Lalmawipuia erawh palina a ni thung. Suzuki Gixxer Cup huangah hian champion chuan Suzuki Gixxer SF a dawng dawn a, pahnihna tan Gixxer Naked niin pathumna chuan Scooter Lets a dawng thung ang - inelna hi thirh round neih leh tur a la ni dawn.

Nuai hnih leh tlem...

Mizoram chhunga motorsports ngaina­tu mi ṭhahnem ngaiten kum 2009-a an din Mizoram Motorsports Association (MiMSA) hi association naupangte a la ni a, national leh international level-ah sulhnu chhuan tura a la ngah lo.

Amaherawhchu, Mizo ṭhalai ten a bik takin bike intlansiak an ngainatzia leh an tuipuizia an hmu kar, an theih ang tawk tawkin inelna an buatsaih ve ṭhin. Tun sorkar kum kal laia an budget chu Rs 2,57,700 chauh a ni!

Tun ṭum national championship chhim tur hian India rama media hrang hrang zingah sawm bik 13 kan ni. Times of India, Deccan Chronicle, BBC Top, Auto Car, Sportskeeda.com, NDTV, Auto X, New Indian Express, Sakal Times, Car India & Bike India, EVO, Dainik Bhasker leh Vanglaini te kan ni.

Mizo rider ten result ṭha an neih hnuah media zingah zawhna ka dawng hnem bik a, India ram hmarchhak kila awm Mizoram dinhmun chu "Hriat chian leh zual" an duh a ni. Hmaichhan bakah call leh whatsapp kaltlangin zawhna chhan tur a awm deuh reng.

Turial Airfield hlui lama MiMSA-in inelna an buatsaih ṭhin aṭangin ka thiam leh theih ang angin ka sawi a, kum khat chhunga kan state-in budget atan a dah zat ka sawi lai chuan a ṭhen an meng phawk a, a ṭhen mak tia an chek laiin Wowww Woww ti tawk an awm bawk. Mak an ti hi a mak lo, MiMSA budget hian championship lian tham buatsaihna chu sawi loh racing bike ṭhenkhat man pawh a zat lo miau a ni!

An ti mai mai lo

India rama motor ke siamtu lian tak pakhat JK Tyre & Industries buatsaih a nih avangin a ṭul huna hman turin sum an ren lo a, chutih rualin holam takin an kawhral satliah lo. Media leh rider kalkhawmte chu hotel ṭha Le Meridien-ah min khung khawm thei, vei vahna tur motor min buatsaih sak vek bawk.

Inelna ṭan a nih hma, sawmna an thawn chhuah rualin ni hnih chhunga hun hman dan tur Program Sheets an thawn tel nghal vek. An program sheet-a an ziah lan angin ṭan hunah kan ṭan a, a tawp niah pawh phur luat vanga hun pawh rei chiam a awm chuang lo.

Thlen hunah kan thleng kim ṭhap a, nghah ngai an awm lo kha entawn tlak tak an ni. "A tlaite kan nghah zel hian hun vawng dikte kan hrem mai a ni" tih lo tuipui ve bur mai mi ka nih avangin kan hun hman dan khan ka rilrem zawng tak a ni. Sum hek si lo, awlsam tea an tih dan ṭha tak kan entawn theih chu hun vawn dik a ni.

JK Tyre Motorsport manager Rohit Kumar-a'n Mizo ṭhalaiten bike khalh an thiamzia leh theihna an neih sanzia a sawi uar hle. Chher tlak zawng tura Mizoram rawn kal ngei an duh thu pawh a sawi tel bawk, ruih theih thila fihlim, tih takzeta motorsports ngainatute tan kawng a inhawng thei dawn niin a lang.

Bike intlansiak hi vantlang kawngpuia neih chiam chi a ni lo a, a hun leh hmun thlan thiam loh chuan chhiatna rapthlak thlen thei a ni. Chutih rualin tlanna tur hmun bikah a hun taka tlan a nih erawh chuan infiamna hmuhnawm tak a ni thung.

- Lal Thansanga, Reporter, Vanglaini