Kawng leh politics
Mizoram hmun hrang hrang han kal kual ila, kumin chu kawng ṭha lai a awm lo chu a ni ber e. Lengpui kawng, Sihhmui pelh chin khu a ṭha hlurh mai a, a dang chu khawi hmun mah hi ṭha lai a awm lo. Hetiang em ema chhe tura thuneituten hun an nghak thei te, a chhiat ṭhak hun an nghak theite hi a mak hle.
Kawng siam nan sum a awm lo nia an sawi ṭhin lah, hman deuh khan sum a awmzia tarlan a ni a, chanchinbuah te pawh kan chhiar kha. Chuti chung chuan khawi hmun mai pawh hi enkawl loh ang mai a ni. PWD lam hian hma an la chak tawk lo ai mahin kan kawngpui neihte hi politic thil vel atana a chhiat ṭhak hun nghah a ang zawk mahin ka hria.
Inthlan hmachhawn tur kan ni a, chumi hre rân chuan roreltute lam hian kawng siam ṭhat leh thawmṭhat hi an hmanhmawh loin, inthlan hnaih dawna tihmam zuar kha campaign au hla leh insawitheihna tur atan an duh a nih hmel. Hetiang rilru hi an pu tak tak a nih chuan tuna sorkar lai hian mipui hamṭhatna leh awlsamna tur tak tak aiin thuneihna chauh an duh a ni tihna a ni ang a, rilru tenawm tak an pu tihna a ni ang.
Nikum chhung khan tuna kan kawngpui chhe ta tam tak hi siam ṭhat a, enkawl hlek ni ta se, kumin furpui rawn thlengah pawh tun ang em ema chhia hi chu a nih a rinawm loh. Nikum khan pawisa awm reng chung siin thawh mumal a awm lo a, kawng ping tih tlang hlek hlek te chu a awm a, chungte lah inchhuanna tur chi a ni lo. Kuminah ṭhâl khawro kan tih ang ṭhin pawh awm hman hlek loin ruahtui kan dawng hma a, chêt ngaihna a awm ta lo. Chuvang chuan a hma kuma enkawl mumal tawh loh kha nasa takin a chhe zual ta a ni.
Mizoram ang ruahtui tamnaah chuan kawngpui chhe hlek hi chu ngaihven ran a ṭhat tehlul nen an ngaih bosan rei lutuk mah mah a, kuminah hmalakna tur khua awmzui thei tawh bawk si lo, mipuiin kan tuar ta a ni. Sum a awm thu kan hre châmchi a, mahse hmalakna leh enkawlna a awm si loh chuan kawngpui ṭha neih ngaihna a awm lo. A enkawltute hian a chhiat hun hi nghak khawl ṭhin lo se, hma la thuai thuai zel se chuan tun ang dinhmun hi chu kan thleng lo ang.
Roreltute lam lahin inthlan campaign nan hman an tum emaw tih mai tur a ni. Mipui hamṭhatna leh hmasawnna tur tak tak ngaihtuah lo a, thuneihna rilru, rorel khawl fawng chelhtu nih tumna ringawt aṭang hi chuan hmasawnna tak tak a awm thei loin, kawngpui ṭha hi chu kan nei thei dawn lo a nih hi.
- Lalhlumawia Ralte