Ṭawngṭai rualna chauh lo deuhvin aw

Mizoram Kohhran Hruai­tute Committee chuan kan rama ruihhlo lo hluar zel leh kan ṭhalai tam tak a suat tawh bakah, a bawiha mi tam tak an tang mek hi pawi a ti a. Chuvangin, August 13, 2017 Pathianni zan hian ruihhlo laka kan ram a lo fihlim theih nan leh ruihhlo bawiha tang mekte tan ṭawngṭai rualna nei tur leh helam hawi Pathian thu chah sawi ṭheuh turin MKHC chuan kohhran tinte a ngen a. Kan rama ruihhlo lo hluar zel tireh tura mahni kohhran ṭheuha theihtawp chhuah a hma la zui zel turin an ngen bawk.

Buaipui tham ruihhlo ngai: Tun hnaiah, Mizoram Synod Revival hmalaknain, Operation Nehemia program neiin, Revival team-te Aizawl khawpuia ruihhlo ngaite leh mi awm ṭha duh lote hnenah, rawngbawlna an hmang mek a, chu rawngbawlnaa inhmangte chuan, an rin phak baka kan khawpui nun ṭawp tawhzia sawi tur an ngah hle.

Mizoram mipui nuai sawm awrhah ruihhlo ngai buaipuina hmun De-addiction Centre 29 ngawt kan nei ta mai te, chuti zat Home awm si, Ṭawngṭai Bethel Camping Centre-a mutna leng lo khawp, dah luh ruih ruih tur kan la nei reng mai te, ṬBCC sawi bawrhbana a awm vanga mi 200 chuang zet an inlak chhuah hnu lawka, inla chhuakte zinga mi, Over Dose avanga mi 3 ngawt an thihzui nghal tak aṭangte hian, ruihhlovin kan ram a chiah hnehzia chu sawi duah a ngai awm lo e.

Kan chet dan a fel tawk lo: TBCC bihchianna khan kan chet dan fel tawklohna a tilang. Central YMA kum puan bawhzuina avanga Branch hrang hrangte hmalaknaah, an veng chhunga ruihhlo ngaite an man tam tak chu, an chhungte pawh rawn lem lovin ṬBCC-ah an nam liam zung zung mai niin a lang a, chu chuan a chhunga lutte leh an chhungte thinrimna pawh a siam niin a lang. Chutih rualin kan sorkar lam aṭanga De-addiction Centre kaihhruaina mumal la awm lo pawhin nghawng thui tak a nei bawk. Cabinet meeting approve hi eng chen nge kan nghah dawn?

Hawh teh u, i din thar leh ang u: Heti taka kan ram natna hi chhan chhuak turin sorkar mai ni lo, Kohhran pawh hi kan harh thar a va ṭul tawh em. Hmanah khan kan ramah phar (leprosy) natna a darh zel loh nan tiin, kan zavaia hmalak nan, Kohhran tinin Leprosy Sunday hmangin, Leprosy Choir te dinin, hma kan la hup hup a. Tunah erawh chuan kohhran lian ber Synod chuan, Leprosy Sunday chu a ti tawpin, a aia huam zau zawk, Heal Sunday hman a ni ta.

Phar natna vei mi 100 awrh kan awmnaah pawh, heti taka hma kan lak laia a sang bi mai pawh ni lo, sing tel teh meuh, HIV hrik pai kan neih tawh hunah hian, Kohhran tin hian, hmalakna thar kan neih chu a ṭul tawh a ni lawm ni? Ṭawngṭai hona maiah hian em ni kan duhtawk dawn?

Heng mite hi, kar khat lek gospel camping-a dam chi an ni lo. A kum tela camping centre-a an awm a ngai. Home kan neihte lah a dintuten rinna hmanga an din deuh vek an nih avangin, an mamawh neih loh an ngah lutuk. ṬBCC chauh lo pawh Home dang tam tak hi ṭanpui ngai an ni. Mimal ṭhahnemngaiten, Samari mi ṭha (LPS Programe) kal tlangin, an pek ṭhin kan hria, Kohhran lam hian, kan kohhran puala Home kan neihte chauh ni lo, Home tam tak, ṭanpui ngai an awm reng si a, Kohhran sum hi he lamah hian nansa zawkin kan luan chhuhtir ve tawh dawn lawm ni?

Sorkar pawhin kan ram natna hi vei ve teh se. Mi thiam, an mamawh ang pawh pe lova tun tlenga kan la ngaihthah thei hi chu, Mizo ṭhalai tam tak nunna suattu chunga kan rilru put dan hi, harh chhuah a va hun tawh ve le. Hawh teh u, kan ram natna hripui, rapthlak tak hi do let turin, thapui i chhuah teh ang u.

- Lalrinliana Colney