Tun hun atan Sap ṭawng

Miin an thiam ang tâwkin Sap ṭawng an hmang a, “Mahni ramah Sap ṭawng hman a ngâi lo e,” kan tih loh leh an hman dik loh lâi kan zawng a, mahnia nuih mai duh tâwk loin mi dang kan han pun ah! “Mizo hi chu aw...” han ti ngawt i la, hnam changkang zîngah pawh hetianga hma sâwn lo zawnga khawsa chi hi an awm ve tho ang.

Lehlamah, dik lo mangkhênga an hman chuan eng ṭawng pawh hi a nuihzatthlak châng a awm vek mai; “A zak lângah ka suanlam,” “A sukah so lawh,” tih te pawh kan nuihpui bâwk bâwk vek alâwm. Bob Marley te khan Sap ṭawng chu a hmang duhdah ve chiang; mah se khawvel mi lârte zingah chuan a tel reng tho chu a nih hi.

Ṭhalai zingah English medium chhûl chhuak hi a tam zâwk kan ni mai âwm mang e; chumi awmzia chu, English-in kan ṭawng thei a, thu kan ziak thei bawk tihna a ni. Chu chu eng atan nge kan hman? Ṭhiante nuihzatna atan chauh chuan a pamhmâi deuh em? Lam nalh dân leh lam dan dik te hi kan tuipui êm êm mai a, mi lam dân dik tâwk lo lo sawi zet zetna atan chauh em ni kan thiamna hi kan hman dawn?

Tunlaiah chuan khawvel thil thleng hi hmun kilkhawr bera awm pawhin an lo hre ve zung zung zel a. Chanchin dik tâwk lo hi a thang chak hlei hlei a ni ṭhin. Hetiangah tak hian kan Sap ṭawng thiam hi chhawr i la, India rama kan Indian-puite lakah ziakin ṭan i la ang u. Sap ṭawng thiam tak tak kan tam tawh tih kan hria, chutih laiin kan hnam chungchang thil pawimawhah pawh keini aia kan en hniam zâwk hian chanchinbu lamah te Sap ṭawngin min hêk zeih zeih reng mai niin an sawi ṭhin si a. Ziah lama chêt kan lâk hi - haw hawa innawr ai chuan - a kawng a dik zawkin a lang.

Tunlaia kan rama hnam dang awmte nen kan inbakkaihna chungchangah te hian a thiam chu chêt ve zung zung a ṭha hle. India ram chanchinbu lian, Sap ṭawnga an chhuahah te hian Mizo thuziak article te hi chuang fo thei se. “Anni chuan khutah, chanchinbuah an chhuah a, keini hi engati nge?” ti ringawt loin, Facebook lama English nalh deuh deuha status update ringawt loin, India Vaiho hriat thamin i ziak ve ṭhin ang u.

Tun hnai lawkah Mizopa thawh Times of India-ah a lang ve a, a thawhtu kan chhuang hle; a âite chhin­na chauh a ni ngêi ang.

Ziaka ṭan lâk hi chu kawng tam tak zinga pakhat mai a ni a, ziakah chauh ni loin, kan game khelh hi a level sân a hun tawh e. Mahni kawtkâia inhrosak hi game-ah pawh a level hniam ber chi, naupang zia a ni si a.

- Rempuia R. Lutmang