PA REM HRE LO PA TAL HAH (VEHICLE EMMISION TESTING )

India ramah kan awm a, chuvang chuan Motor Vehicle Act 1988 leh a hnua siam ṭhat, Motor vehicle Rules 1989 te, Ammendment 2019 te kan hmang ve a ni. Heng dan hian a tum bulpui ber chu kawng hrang hranga India khua leh tuite tana himna siam a ni. Chutiang zingah chuan kan boruak ti thianghlim lo theite laka mipui venhimna tura hmalakna pawh a tel ve a ni.

Boruak ṭha lo pechhuak tam lirtheite chu siamṭhat a, an boruak pek chhuah zinga mihring tana thianghlim lo theiah chuan pawm theih chin pawh lirthei thar leh hluiah te, an fuel hmanah te dan a nei hrang thliah thliah a. Chu chu kan lo zawm ve ngei tur an ni tiin thuchhuah chu sawrkar chuan a siam ṭhin a ni. Danpui leh tesep, order ni leh thla te an bung leh chang lam chu dahṭha rih phawt ta ila.

Lirtheiten mihring tana boruak ṭha lo an pek chhuah tam dan chu endik a lo ngai ṭhin a, chu chu Pollution Under Control Certificate (PUC) nung (valid) kan neih ṭheuh a ngai. Mizoramah hian chutiang endikna hna chu Mizoram Pollution Control Board (MPCB) in an kengkawh a, lirthei ṭhate hnenah certificate an pe chhuak chauh ṭhin. Tuna kan kalphung tak hi harsatna min siamsaktu a lo ni ta, roreltu Sawrkar chuan mipui phurrit siam lova, dan zawmna tura awlsamna siam hi a mawh a ni ta. Nimahsela a kalkawng leh a tih dan tur an hre lo nge vawiin thlengin lirthei neitute tan harsatna siamtu pakhat a ni ta zel a nih hi.

Mizoramah hian lirthei chi hrang hrang 3,12,994 (as on 2020-2022) an awm a, chutah chuan private lirthei lamah 312952 an awm a, Sawrkar ta 6272 an awm bawk. Aizawl District ringawtah hian lirthei 217389 a awm. Mipuite Pollution nasa tak laka kan himna tur kawng dang danga hmalakna karah lirthei ringawt khiti zat enkawl tur khian MPCB hnuaiah hian thawktu tlemte, an vaiin charman aṭanga 4th grade thlengin mi 62 an awm a, mi 62 zingah hian officer leh mawhphurhna dang nei office staff te, scientific assistance te driver chowkider, lirthei PUC buaipui lo tur zawngte hi han paih ila, an staff strength pawhin an zawh loh nghawngkawl an bat a ni tih a lang chiang viau awm e.

Lirthei chi hrang hrang aṭang hian Mizoram sawrkarah hian chhiah hrang hrang cheng 25,16,72,016.00 lakhs hi a lut hialin a hriat (Vide No G12013/1/2021-DTE(TPR-AC of 6th April 2022). Hetiang kan ni chung hian PUC fitness check na center chu hmun 4 ah chiah kan nei. Aizawlah 3 Lungleiah pakhat. Hetih lai hian Cachar District (Assam District pakhat) chuan hmun 18 ah an nei a ni. State pumpui hian Assam District pakhat neih zat pawh Testing Center kan nei pha lo nasa mai!

Mi 3000 vel tan ruai buatsaih i la, chaw leh eitur dang dawhna counter 2 chauh siam ta ila, mipui chu an intlar thui ngawt ang. Lirthei nuai 3 chuang tana Testing center 4 chauh min han siamsak hi chu "Kha ule, buai ve teh u” intihna ang lek fang a niin a lang. Harsatna sutkian mai ni lo, sawrkar a mumal nana ruahmanna siam thiam lo hlir Politician kan la nei em ni a tih theih hial awm e.

Hetiang PUC licence pe chhuak thei tur hian a khawl pakhat 1.7 lakh (approx) man neih a ngai a, Diesel, Petrol, LPG hmang lirthei te enna tur hrang thliah thliah pawh hian a man a to loh dan a awm a ni.

MPCB chauh hian a enkawl chhung chuan kum khata office working day zawng zawngah hian an khawl chhe miah lo se, thawktu damlohna nei miah lo hian endik ta ngar ngar bawk se, ni khatah lirthei sang chuang an endik a ngai hial awm e. Chuvangin sawrkar hian MPCB kut aṭang hian Vehicle Emission Testing kher hi chu mimal emaw, Society/Trust lamah pe chhuak (outsource) mai sela. Dan kan zawm ṭhain kan awlsam tlang zawk ngei ang.

Engtinnge kan tih ang tih lam chu thil harsa a awm hauh lo. Hetiang Testing center hi Sawrkar phalna a din theih a ni. Testing center din tur hian Automobile Engineer te ITI Mechanical Graduate chin tan pawh enkawl theih a ni. Hetiang hian Testing Center din phalna dilna hun siam a, dintir ni ta sela chuan hmun hrang hrangah kan din thei ngei ang. Workshop, Petrol Pump, Millenium Parking leh Parking dang dang remchangah te pawh din ni sela chuan, tuna kan harsatna hi kal pahin kan siam fel mai dawn a lo ni. Chutih rual chuan hemi lama thiamna neite tan eizawnna tur (employment) siam na a lo ni bawk ang. Chutiang center chuan Licence an neihna sum leh pai chu sawrkar hian a lo hlawkpui ve leh bawk thei ang.

Tuna kan kal dan hi chu, 'pa rem hre lo pa tal hah' an tih ang chauhin ruahmanna siam thiam loh vang liau liau a phurrit kan insiam hi a ni chiang khawp mai. Kawng ṭhenkhatah phei chuan India ram khawpui lian leh Pollution nasa tak tak, mihring tana hlauhawm chhinchhiahna pel khawpa thianghlim lo te en tel chunga ram pum tana dan siam (blanket order) hi keini ram, kan zotlang ram nuam kan tih, kan boruak pawh phai lama hralh tlak hial khawpa thianghlim nia sawina hmunah hian, mawng zang fahrana kan lo in man vak vak hi 'sum' tuakna chi khatah kan mamawh vang angin a ngaih theih hial zawk awm e.

Chuvangin, Pollution Under Control Center hi sawrkar hian outsource ngei teh se. Chutih laiin lirthei phai lama chhuak tur tih loah hi chuan fitness buaipui nan thla ruk vel tal lo in thlahdul (relax) bawk sela kan vai atan a ṭha tlang zawk ngei ang.

- Lalrammawia