Zoram khawvel

Zoram khawvel han tih ngawt mai chu huam zau viau turah ngai ila. Mizoram chu ram zim te a ni a, hmarchhak kilkhawr bera awm kan ni a, phai vaiho chuan khawchhak lam mi emaw min ti a.

Zirna lam - Mizoram hi mi nuai 11 vel bawr kan ni a, chhiarpui hnuhnung berah chuan mi state district pakhata awm pawh kan zat mang lo. Chutiang state lian pui pui leh changkang tak tak zingah chuan ziak leh chhiar thiam tam lamah a sang ber pawl kan ni. MZU, NIT, Medical college (ZMC) kan nei a. Training institute leh college kan nei ve nual. Heng zirna hmunah te hian Mizo zirtirtu an ni deuh vek a ni. Tun hma deuh, 1980’s vel kha chuan hnam dang an ni tlangpui. Kawng hrang hrangah kan intodelh zel e.

Ei leh nar - Buh ei hnam kan ni a, kan pi pute hunlai chuan intodelh tak kan ni. Lo neih kan bansan tial tial a, vai buh awlsam taka ei tur lo awm ta nen, reiloteah ration buhfai chu kan innghahna a lo ni ta. Tunah hian buh hi Mizoram hian thla thum ei vel bak kan thar lo, a bak chu state dang aṭanga kan lak luh a ni. Ei leh bara intodelh leh tur hian hma nasa taka lak a ni a, mahse, vawiin thleng hian eng kan ang thei lo. Sawrkar policy a ṭha lo nge, kuthnathawktuten an zir lo? Central aṭangin sum lo kal hi a hmanna tur dikah hman a ni ṭhin lo nge hma kan sawn hleithei lo e.

Politics - Kan pi pute hunlai chuan roreltu Lal ṭha tak tak kan nei ṭhin. An khua leh tuite an hmangaih a, rualkhai takin ro an rel ṭhin. Tun hnu hian kan ram roreltute hi eng nge an an aw? Politics hi rawngbawltute tih ve chi ah kan ngai lo hial ṭhin a, tunah chuan mi ṭha, rawngbawltute an chet a ngai kan ti ve leh a. Mahse, vawiin thleng hian kan beisei ang chu a la ni thei chuang lo.

Mi ram hruaitu ṭha leh ropui tak takte nen kan han khaikhin a, kan lo vote ta kha kan inchhir viau zel mai a nih hi. Ram hruaitute chu tu pawh lo nise, Pathian ruat an ni, hruaitu ṭha a pe a, ṭha lo pawh a pe ṭhin tho a nia - mipuite hian kan phutawk chauh zel a ni, an ti.

Khawvel hmasawn ruala kan kal ve zel thei hi a lawmawm a. Kan zirnaah te thiam tak tak tum ila, kan hna ṭheuhah rinawm ila. Pathian thu nunpui lam ngai pawimawh sauh ila. Vawiina kan nundan ṭheuh aṭang hi chuan kan ram hian kawng dik zawh pawhin ka hmu meuh lo a nih hi. Rawngbawltu ṭha tak tak awmna Kristian ram ni mah ila; corruption, AIDS, ruihhlo ngai, fahrah etc. tamna Zoram khawvel a la ni e.

- Lalchhandama Colney