Thihna leh vote - ngaihtuah a ngai e
Tlawmngaihna hi chi hrang hrang, huang hrang hrang hi siam dawn ta ila, kan politician te tlawmngaihna, a let leh (vote) beiseia an tlawmngaihna hi eng huanga dah tur nge ni ang?
An thisen zawmpui leh an chhungte ni miah lo, an veng chhung leh khaw chhuakte pawh ni lo, an bial chhunga thi an nih vang hrim hrima khawhar in leh mitthi ina an kal hian, an kal chhan lian ber chu vote an beisei vang a ni a, chhan dang a awm a nih chuan a chung chiaha kan sawi khi a ni turah ngai teh ang. Hnam tlawmngai, mi dangte tana inpe ṭhin hnam tia kan insawi ṭhin leh kan inhriat ṭhin, phut let nei loa mi dangte tana kan inpekna, Mizo tlawmngaihna kan tih ṭhin huang chhungah hian anniho tlawmngaihna hi khung ve tur a ni ang em?
A sir lehlamah pakai ila, he thlirna hi en let ve nghal thung teh ang aw. Mipuite hian chhiat ni ṭhat nia lang tam politician-te hi kan ngaisang tlat a, voter tam ber duhdan anga awm hi vote mamawh politician-te tan chuan a khelha khel ṭang ṭang a ngai miau si a, an peih emaw peih lo emaw, a der tal pawha an tlawmngaih hram hram a ngai tihna a nih hmel a, an khawngaih thlak angreng riaute hian ka hre bawk si! A lehlamah chuan ruang thawn tur leh mitthi an awm ruala chhiat tawk chhungkuain an rawn miah loa inrawlh an châk anga lantirtu hi vote pawimawhna hria an party mite pawh a nihna lai a awm bawk ang.
Thingtlang bialtu MLA ten an bial chhunga thi an awm apianga ruang phurh hawna tur lirthei hire na an tumsak ziahte hi vote leh thihna kan la suihzawm zel vang a ni ber a. Bialtu MLA tel loa ruang thawn thei loa inngaih hrim hrim hi a dik chiah em? Khaw khata mi harsa tawpkhawk, khawtlang pawhin âwm an tihpuite chauh hi kan MLA te hian tuam hlawm ta se, mipui hian kan thik hauh lo ang. Chhungkua han ṭanrual deuh a, cheng sang hnih khat ṭheuh thawh khawma kan tih theih reng, ruang thawn hawna tur lirthei hman man MLA te tum tir zel hi kan society kal zel atan a himin kan hria em? bial khatah khaw 20/30 te a awm a, kum khata MLA te ruang thawnna hi tam deuh a ni ta. Phurrit a tling a, an hlawh bâk ngaihtuah a ngai a, heng thil ti lo thei loa siamtu hi mipui kan ni em?
Hmanah MLA engemawzat ka kawm tawh a, MLA pakhat chuan an tan phurrit ni mah se, heng hre sa leh huama ding an nih thu a sawi a. MLA
ṭhenkhat chuan hautak an ti viau thung a, an hming sawi erawh an duh lo hlawm hle! Thihna leh Vote kan thlun zawm mek hi a ṭha alawm tiin kan uar sauh dawn nge? kan MLA tan te, ram inrelbawlna kal zelahte leh ram mipui kal zelna atan a ṭha lo tiin ka hnawl ṭan dawn? nge, Synod takin, 'kan kal dan pangngai hi a la ṭha e' tiin kan ṭin leh rih dawn. Thihna leh vote kan suih zawm mek hi a kalphung her hret tur a awm em?
Ruang thawnna hmun tam taka mi ṭhenkhat ngaihdan lian tak awm reng chu MLA te zar zo ve duhna leh an zar zona awm chhung nia ngaihna hi a ni ve thung. MLA te hi an hausa tulh tulh zel a, an hausakna percentage pawh 100 chuangtea a pung nia an hriat avangin ruang thawn tur hian MLA te hi ren vak ṭulin an hre lo a, miin hausa tulh tulh hmuha an hmuh miau chuan he ngaihdan neitute hi hriatthiamawm angreng tak an ni tlat a nia. Mi tam tak ngaihdanah, 'Heng zawng zawng hi hre sa veka in candidate ngam an ni alawm,' kan tih hian he kalphung leh a nghawng lam chu kan ngaihtuahnaah a awm lo hle tihna a ni phawt mai a. MLA ṭha kan intehna langsar ber zingah thihnaa lang tam leh ruang thawnna tur sum leh lirthei thawh thei an nihna hi kan vawrh lian lutuk ang tih a hlauhawm a, heng thil hi ram pumpui leh hnam pumpui hmasawnna hnuk a tlin miau loh avangin tuna kan kalphung hi beng sika ngaihtuah ngai a tling tain ka hria.
Bialtu MLA te hi khawtlang leh ram leh mimalin harsatna kan tawh chang chuan, an tih theih chinah chuan min thlamuantu tur leh kan harsatna min sutkiansaktu tur an ni ngei mai, mahse, thihna leh vote kan inzawm tir dan hi kan ram kal zelna atan a ṭhaah kan ngai zel dawn nge ram inrelbawlna atan thil ṭha lo zawk a ni e, tiin kan her rem dawn? a phenah eiruk a ṭul phah a nih phei chuan ramin a lo tuar hle tihna a ni ang. Thihna leh vote kan inzawm tir dan hi - ngaihtuah a ngai e.
- Lalnunṭawma Fanai