District tihpuitlin loh a ṭha zawk ang

Kum 2008 Sep­tember 12-a MNF kaih­hruai sorkarin district headquarters atana a puan pathum zinga pahnih - Saitual leh Khawzawl-te chuan district headquarters-a puan an nih tawh chu a taka tihpuitlin an phût a, MLA inthlan a hnaih leh tawh vangte pawh a ni ang e!

District khawpui atana puan khaw pa­thuma chengte rilru aṭanga thlir chuan, district tihpuitlin hi a âwm viau a ni mai thei a, heng khaw pathuma a khawi emaw bera cheng ni ve ta ila chuan, kan ṭang na ve viau pawh a ni mai thei. Mahse, Mizoram pum dinhmun thlir chuan, a kaihhnawih thil chi hrang hrangte ngaih­tuahin, tihpuitlin loh hi a ṭha zawk lo'ng maw?

1. Mizoram hi state dangte ngaihtuah chuan a zau lo a, tuna district headquarters-te pawh hi a inhlat lem lo a, district pariat hi a tâwk tiu teu viau.

2. District thar puan tawhin an district-a awm tura an beisei khuate tan tuna an awm mekna district headquarters a hla lutuk lo a, pan a harsa lutuk lem lo. Khaw ṭhenkhat tan phei chuan tuna an awmna district headquarters pan a awlsam zawk hial awm e.

3. Mizoram sum dinhmun a ṭha tâwk lo. Thawh chhuah kan nei tlem a, district head­quarters pakhat tan chauh pawha sorkar sum sen a tamzia pawh kan hrethiam awm e.

4. District hi tih­puitlin ni ta se, district administration pang­ngai a awm a ngai ang a, sorkar department tam tak an inbun a ngai. Sorkarin sum tam tak a sen belh a ngaih dawn avangin, sorkar tan phur rit a tling thei.

5. District-a puan thar pathum zinga ṭhenkhat phei hi chu Assembly constituency pakhat tiat ang vel lek a ni a, district pakhata Assembly constituency pakhat lek awm hi a âwm lo. State dangah awm tak maw?

6. Tuna Assembly constituency-te hi district inkal thelh a awm lo. Constituency tin hi district pakhat chhunga awm vek an ni. Tuna district puan tawh pathumte hi tihpuitlin ni ta se, Assembly consti­tuency thlengin a khawih danglam thei -a buaithlak dawn.

7. Tuna Saitual awmna constituency, Ṭawi biala chhunga khaw eng emaw zatin Saitual district-a awm an duh loh thu an puang phawt a; Mizoram hmar lam tlungdung khaw ṭhenkhat pawhin an duh loa sawi a awm. Hnahthial lamah pawh, an demand area enin, South Tuipui, Lung­lei North leh Lunglei East bialte a khawih dawnin a lang a, a va buaithlak dawn em!

Heng point tlemte aṭang ringawt pawh hian, Khawzawl, Saitual leh Hnahthial khuate district head­quarters-a puan tawh hi tihpuitlin a rem­chang lo. A khaw mite pawhin ram tana ṭha tur zawk thlir chungin ngaihtuah thei se a duhawm hle. Sorkar pawh hian inthlana tlak hlauhna leh tlin duhna rilru ngawr ngawr ni loin, ram tana ṭha ber tur ngaihtuah chungin thutlukna siam rawh se.

District inpek hi inthlana tlinna a ni lo tih ṭum hnih chu kan hriat chian tawh hi.

- Zoramchhana