Pute u, engtin nge ni dawn?

Nakum maiah kan ram hruaitu turte kan thlang dawn a, kan politician-te pawh tun aṭangin an buai ṭan der a. Tuna, kan rama issue lian tak pakhat chu Saitual leh Khawzawl kum 2008-a district-a puan la tihpuitlin si loh hi a ni. Heng khaw pahnih hian district puitlinga awm ngiatin ṭan an khawh mek a, engtin zel nge an kal ang tih chu Zoram mipuite hriat chak a ni ta.

Inthlan a hnai, vote zawn nana district-a puan tawh tihpuitlin chu thil thleng mai thei a ni. Congress hian Saitual leh Khaw­zawl district hi ti pui­tling ta se, Saitual leh Khawzawlah chuan zaah za mark an hmu ngei ang. Amaherawh­chu, eng nge a sawh khawk lo thleng dawn?

Saitual area tur niawm tak Thing­sul­thliah hian Saitual district a awm an hlau tlat a, thil dang tam tak a awm thei a ni.

Thawmhnaw chu kan mamawh kan lei ṭhin, kan awh na zawng erawh kan lei ngai lo a nih hi maw!

Chutiang deuh chuan district thar hi kan ram hian tun dinhmunah a mamawh belh em? Eng thil pawh an mamawh a, pek awm a nih chuan pe ula; mah se mi thil duh nazawng erawh chu pe lul suh u. Vote zawn nan sawrkar siam nan mipui thil duh hi tihhlawhtlin a nuam viau mai thei, tihhlawhtlingin tihlawhtling lo mah ula, district ah kher ni lo, eng thilah pawh ram hruaitu ṭha chu a hruai mipuite’n kan hre reng tho a nia.

Tui thianghlim kan in fo chuan a intu mipui pawh kan hrisel ang, tui thianghlim lo kan in fo erawh chuan kan bwrhsawm dawn. Kan ram politic hi a thianghlim chuan a chhunga cheng ram mipuite pawhin rilru hrisel puin hma lam kan pan thei ang a, politics a thianghlim loh chiah chuan a chhunga cheng mipui­te'n natna kan ngah a, sorkar lakah duh leh mamawh kan nei ṭeuh ṭhin. Kan ram dam nan politics thianghlim khelh hi kan ram hian a mamawh a, chutiang mite chauh chu vote tur an ni.

Pute u, heng khaw pahnihte thil ngiat, a ngiattute tana thil awm hliah hliah, nangni tan pawh vote zawn nana hman chakawm takah hian engtin nge hma in lak dawn le? Kan mamawh ngawih ngawih pawh kan neih mumal theih loh laia kan awh neih kan tum tlatna hian thil ṭha nge thil ṭha lo a hrin chhuah dawn?

Saitual leh Khaw­zawl district puitlinga hlankai chungchangah hian, pute u ngaih­tuahna fim tak nen thutlukna ṭha han siam hram teh u.

- Ramchhana Hmar, Phuaibuang