Two wheeler taxi khalhtute inenfiah teh u

Tun hma deuh aṭang khan khawpuia lirthei khalhtute zingah taxi driver hian 'mâwl' tih an hlawh thei khawp a. A chhan ber nia lang chu, mi dang ngaichâng lem loa anmahni remchan dan dang danga kawngpuia din te, inher te, passenger lak leh chhuktirte chíng an awm ṭhin vang a ni mai thei.

Hetianga ti mai ṭhin hi tun thlengin taxi driver eng emaw zat an awm a; mahse, an ni vek bik lo a, 'polite' tak tak, mi dang ngaichanga hawihhâwm tak tak ṭhahnem tak an awm ve bawk tih erawh kan hriat a ṭha. Hawihhâwm lote leh mâwl taka che ṭhinte avangin miin taxi driver zawng zawng an hmer tel ta ṭhin niin a lang. Driver hawihháwm lo tak tak hi chu taxi driver zingah chauh ni loin, lirthei dang khalh, private motor khalh zingah pawh eng emaw zat an awm ve tho a ni.

Kum tlemte kal ta aṭang khan Aizawlah two wheeler taxi a awm ṭan a, kum 2019 vel aṭangin permit tam zawk pek chhuah leh a ni bawk a, tunah chuan Aizawlah two wheeler a tam ta hle; khawpuiin a mamawh zat aia tam daih a awm tawh àwm e.

Two wheeler taxi a tam a, a khalhtu zingah hawihhâwm tak tak leh fel tak tak an tam laiin, hawihhawm lo fe fe, mawl fê fê pawh an tam leh ta hle mai. Two wheeler khalhtute an inenfiah a ngai hle mai; pawl ang pawha an infuih/inzilh a ngai ta viauin a lang.

Mizote hnam dang laka kan lan mawina pakhat, kan chhuan em em ni bawk chu traffic jam laia kawngpui âwl laia intlân pel mai lo a, an intlar ṭhap ṭhin kha a ni a. Chutiang thlalak chu a darh chuai chuai a, Mizoram páwn thlengin; Mizo nih tinuamtu, kan ti a, kan hmai a uan phah hial a ni lo'm ni khah?

Mahse, chu Mizo nih tinuamtu, kan hmai tiuangtu, hnam dang laka kan chhuan em em chu two wheeler taxi-te hian an tichhe ṭan mek. Four wheeler chauh ni lo, two wheeler-te nen lama traffic jam-a an din ṭhap laia mi dang ngaichang lo lêka tlan pêl ta zut zut two wheeler hmuh tur a tam ta hle mai. Chuvang chuan, 'Two wheeler taxi driver mâwl' tih ṭawngkam hriat tur pawh a tam sâwt hle.

Two wheeler taxi khalhtute lo inenfiah u la, hmanhmawh fâl bik lo u la; mi dang ngaichângin, hawih­hâwm takin kan lirtheite i khalh hlawm teh ang u khai.

- Zoramchhana