RTI-IN NGAIH PAWIMAWH A HLAWH LO...

May 21, 2020 khan Health Department Directorate-ah Right to Informarion Act (RTI) hmanga information dilna ka thehlut a, vawiin thlengin chhan­na ka la dawng lo. 

Ni 30 chhunga chhan tur a nih avangin June 21 (Pathianni) thleng hi chhanna hun an nei a, mahse a hunah min chhang thei lo tih erawh a chiang tawh. Min chhan theih loh chhan lah min hrilh hek lo.

Nikum lam khan Finance Depart­ment-ah finance chungchang RTI hmangin information dilna ka thehlut bawk a. Tun thlengin chhanna emaw, min chhan theih loh avanga sawifiahna emaw ka la dawng eih lo. A dang pawh sawi tur a tam. 

Finance Depart­ment-a RTI ka dilna hi receipt mi pek nachang an hre lo a, an hrethiam hek lo. Ka dil luih fe hnuah ka submit aṭanga ni engemaw zat liam hnuah min pe hram a, vanduaithlak takin ka la tibo zui. Kar lehah ka submit nawn leh ang a, ka tibo tawh lo ang.... Health Department-a ka dilna erawh receipt ka dah ṭha vek a, dan angin a kalpui zui theih thung ang. 

India khua leh tuite hian sorkar chet dan engkim dan ang taka kan hriat ve theih nan dan siam a ni a. Chu chu Right to Information Act, 2005 a ni. 

He danin a huam loh tlemte tih loh, sorkar chetvelna leh hmalakna zawng zawngte chu kan hriat duh apiang kan dil thei a, engemaw RTI danin a huam loh thil a awm a nih loh chuan ni 30 chhungin sorkarin chhanna min pe tur a ni. Min pe thei lo a nih pawha hmalak zui zel dan tur thlengin fel taka tarlan vek a ni bawk. 

Sorkar hi a lang tlang tulh tulh tur a nih lai leh, chutiang tura dan siam a nih hial laia RTI hmanga information dilnain ngaihpawimawh a hlawh lo fo dawn a nih chuan thil fel lo tak a ni ang. 

Sorkar kalphung a fel lo hle tihna a ni thei bawk ang.