Aizawl chhehvel khamte hman ṭangkai

Kum 1994-ah Gospel Centenary kan thlen khan Durtlang Leitan hi khuha a chungah Tourism Office dah a, Restaurant changkang tak siam ni sela. A chhipah Kraws lianpui eng pup mai, Aizawl leh Zoram hmun tam tak aṭanga lang thei tur ‘Zoram Land Mark’ ni mai tur siam ka lo rawt tawh a. Chuta ṭanga chhuak chuan chhim leh hmar zawngin kham ko chungah hian kea kalna kawng siam ni sela tih te nen. Mahse a puitling ta lo kha a ni a. Vawiin thleng hian ka rilruah a la thi thei chuang lo.

Chanchin buah Minister zahawm tak Zodintluanga UD & PA minister hovin kawng siam turin an en tih ka lo chhiar a, ka va lawm tehreng em! Tipuitling ngei se ka duh hle mai. Leitan aṭanga a chhim lam chauh ni lovin a hmar lamah te pawh siam phei ni bawk se a ṭha lehzual ang.

Ram ka hmu zau tulh tulh a, ka rilruah a awm lian tulh tulh ṭhin. USA-a Rock Island, Lungpui lian chungzawl en tura mipui sang tel kal ṭhinna te, Katmandu-a khawpui thlirna tlang te, USA leh Canada ramriah Niagara Fall kam sira a enna kawng an siam te, Visakapatnam chung tlanga Lungpui Titanic anga an chei te ka ngaihtuah chhuah leh ṭhin chang hian, kan Aizawl khawpui chheh vel kham chawi ko tohlawt leh tlang nuam tak tak, tourist hip nana siam awl tak tak tur te hian min cho thar leh ṭhin. Aizawl aṭanga hla tak Chalfilh tlang leh hmun hrang hranga kan ram ngawte tichereu veka tourist centre siam te ai chuan sawrkar sum bawm hian a hlawk­pui zawk ngei ka ring bawk.

Sikkim State chuan Nam­chi khawpui chung tlangah Ghautama Budha lim lian mangkhengin an siam a, chuta ṭang chuan an khawpui chawmna tui chu an luan chhuahtir a. Ngun taka zuk ngaihtuah chuan an rilruah sakhaw thil lam zirtirna a tel tih a lang reng mai a. ‘Gautama Budha aṭang hian nunna tui kan hmu a ni’ tih mipuite ngaihtuahnaah a awm theih nan an ti ni ngei tur a ni. Sikkim state sawrkarin khutiang khu an tih theih laiin kei nin eng vangin nge Durtlangah hian Kraws ropui kan siam theih loh bik ang le! ka ti ṭhin.

Kristian ram kan inti bang lova, kan ram Land Mark atan Kraws ngei hman chu a dik thlapin ka hria. Tunah chuan kan Aizawl khawpui leh Zoram hian Land Mark sawi tur kan nei lo. Zoram chhung leh Zoram pawn pawhin min hriatna ber chu ‘Aizawl Temple’ hi a ni mai.

Kolkatta kan hriatna chu Howrah Bridge a ni a, Delhi hriatna chu Indian Gate a ni a, Agra hriatna chu Tajmahal a ni a, Hyderabad hriatna chu Charminar a ni. State leh khawpui hrang hrangte hian Land mark ropui leh hmingthang tak an nei deuh zel a ni.

Tlang ram leh Kristian ram kan nih ang taka kham chawi chunga Restaurant nuam tak khawthlirna hmun nuam tak tak awm leh a chunga Kraws ropui tak mai eng vu reng mai chu kan state leh Aizawl chhinchhiahna (Land Mark) atan han siam ve thei ila ka va ti teh reng em! Khawi lai laiah emaw chuan hmun langsar deuh lai apiangah mi ṭhahnemngaiten Kraws chu an phun tam ta hle mai. Chutih rualin Mizoram leh Aizawl tana Land Mark tling khawp erawh khawi laiah mah kan la nei lo. Leitanah hian kan ti thei a nih ngai chuan chuta ṭang chuan chhim leh hmar zawngin kea kalna leh Cycle-a kalna, a ṭhen lai laiah khawthlirna hmun zau bik nen han siam i la. Chu chuan Mizoram pawn aṭanga tlawhtute chauh hip lovin Zoram mipuite hi nasa takin min hip dawn chiang mai a, sawrkar tan sum hnar ṭha a tling ngei ang. Chutih rualin hringnun hlimna, nun zalen, min tihrisel thei min pe tel ngei bawk ang.

Heng kan kham leh tlang mawi, public tana remchang tak tak te hi mimal hnena pe ral mai mai lovin kan sawrkar hian humhalh sela, mipuiten hlim taka hun an hman nan leh sawrkar tan sum hnarah hmang ṭangkai zel teh se.

- Commissioner Lalkiamlova, Tuikual South