Ram hmangaih inlar hun?

Inthlanpui a hnai a, ṭum dang ang bawkin tualchhung politics boruak a sang chho leh dawn ṭan hle. Sorkarna chelh mektu Mizoram Pradesh Congress Committee, Mizo Natioal Front (MNF) leh Right to Information and Deve­lopment Society of Mizoram (PRISM) ten inthlan an chuh ngei dawn tih a chiang a; tun hnai maiah Mizoram People Conference Party (MPC), Zoram Nationalist Party (ZNP) leh Zoram Exodus Movement (ZEM) te chuan thawhho an remtih thu an puan ve leh tak avangin kum dang zawng aiin nakkum inthlan hi a ngaihnawm dawn ni pawhin a lang.

Tun hnai kum 20 chhung chu MNF leh Congress ten rorelna fawng an invawn chhawk a, hruaitu ṭha leh hmathlir ṭha tak tak nei ni mah se mipui min hruai danah mi tam tak beisei an phak lo a, ram changkang zawkte chinchang hre pak nia inngai chinte phei chu an lungawi mawlh lo niin a lang.

Political party-te hmalak dan duhkhawp lo leh ram hruai thei nia inngai pa fing pui pui sawi tur an awm a, heng zinga mi ṭhenkhat fin erawh chuan tapchhak zawl bak a pel lo niin a lang! Pawn lam aṭanga lo thlirtu tan erawh chuan ram hmangaih tak vek an ni. Ram hmangaihtu hi an la inlar belh zel a rinawm bawk.

Kohhram hruaitu hlun leh Val upa ṭhenkhatin an din Zoram Exodus Move­ment (ZEM) pawh hi kan sorkar hrawn lai leh tun hma lama thuneihna fawng chelh tawhtute duhkhawp loh vanga rawn pen chhuak niin an lang. Anni hian ram an vei a, siamṭhat an duh a ni. Rorelna khawl chelh tumin political party pahnih ZNP leh MPC te an thawhpui dawn.

ZEM hian ram siam ṭhat an duh takzet a nih chuan a chhunga an lunchilh a ngai a, an lut dawn bawk niin a lang. Chutih rualin an thawpui party pahnih kan thlir chuan tun hma lama tualchhung politics-a thil thleng tawh ang bawkin a tak ram thlen hmain an ṭil ṭiak leh mai ang tih a hlauhawm, tei rei peih a ṭul ang.

Tin, heng pawl thar inzawm khawmte hian party hmasate tihdan hmasa anga mipui te hne tawh leh ngainat loh zawng bawk candidate atana an rawn chhawp chhuak leh a nih chuan beidawnna thuah hniha min hnuk luttu mai an ni thei. A ngaihna hria leh hmathlir nei ṭha an chhawp chhuak a nih ngat erawh chun beiseina min siam­saktu an ni thei bawk.

Kam ram hruaitu ni ṭhin leh ni mekte hian an theihna tawp an pholang tawh a, an thlen chinah kan lawm lo. Anni bawk hi an rawn ding leh a nih chuan mipui tan duhthlan tur ṭha an vang leh dawn. Candidate rawn siam fimkhur se.

Mizo mipui zingah political party thliar hrang lo, mi ṭha leh ram hruaitu ni tlaka an ngaih te vote mai duh an tam tawh a, heng mite hian duhthlanna dik an hman theih nan thlan tur mi ṭha an phu.

Inthlanna chuh tum te u, hna thawk tak tak ngam leh ram hmangihtu dik kan duh - Duhthlan tur mi ṭha min chhawp chhuah sak mawlh rawh u...

- Rosy, Zemabawk