RAMRI HUMHALH HI CHU KAN VA LA NA LO TAK EM !

Vairengte thlang lawkah, vai hovin dawr an rawn siam a, dawr 10 chuang a awm tawh. An insawi thiamna chu, keini'n ram páwn aṭanga lo lutte en felna kan siam vang niin an sawi. Mizoram sorkar leh Assam sorkar, SP level-a inbiakna an neihnaah, hun eng emaw ti chhung atan chauhva dawr siam an nih thu an inhrilh, chu chu kan thu tâwpna a la ni rih, chutah chuan kan lungawi mai dawn tihna a ni em?

NGAIH A VA ṬHA LO EM:

Keini'n ram pawn aṭanga mi lo lut, kan lo check-na chuan, an mit a tikham a, dawr siam nan an rawn hmang ta mai hi, helai ram ruak kan hman dan chu inang lo tak a ni. 

Boruak hrisel kan neih hun a la rawn thleng ang a, keini chuan helai ram kan hman hi chu hman zui zel a ngai tawh lovang, chutih hunah chuan vaiho pawhin an dawr siam chu an titawp nghal mai ang em? A teuh lo mai.

Vaiho sumdawn thiamzia leh bul an ṭan tawh chuan, kar chhuah an harsatzia kan hre ṭheuh, an insawh ngheh tak tak hma hian, kar chhuah theih dan kawng tinreng zawn nghal rum rum chi a ni zawk. SP level-a indawrna hi a beitham lutuk, ngaih hi ṭha thlawt lo.

ZOPHAI LAM PAWH HI:

Helai hmun pawh hi, kan ṭhalaite'n thisen chhuak khawpin an humhalh chung pawhin, Mosolman biak in sak chu an châwl duh hauh tawh lo, kan Minister-te an zuk kal a, an vaupung thawm social media-ah kan lo hmu, high level-a inbiakna lah, thu mûm a la awm thei bawk si lo. Thla han timuangtu hma lakna hi a la awm tak tak lo. Helai hmun pawh hi kan la chán hlen mai ang tih hlauhawm tak a ni.

HOTU HMASATE KHA:

Ramri chungchanga hma la na ngam kan neih chu, Pu Ch. Chhunga leh Pu Ṭhena te khan, ṭhangtharte tana sulhnu hnutchhiah an nei. Pu Chhunga khan ram humhalh nan leilet, an mamawh em em pawh ni lo, ram hauh nan a lo siam a. Chu chu tun hnaiah, MZP ten Zophaia chawlhbuk an sak aṭangin, ṭhangtharten Pu Chhunga ram hauh natzia kan lo hriat phah. Tin, Social media lamah, Pu Ṭhena khan, ama hovin Cachar nena kan inrinaah, ramri lung a zuk phun lai video kan hmu bawk. Chu lungphun chu khutah khutah, vai ram chhungah a awm daih tawh. 

RAM HI CHAN ṬHEN LO ANG U:

Vairengte bul ram pawh hi, Covid-19  chhuanlam hian, vaiho hian remchangah hmangin, insawh ngheh nan an hmang leh palh ang e. Kan hotute hi, hripui do kawngah an buai em em, buai tak an ni, mahse hripui do chung hian, ramri thu pawh hi an ngaihtuah hman tho ang. Tuna an hma lakna aia na zawka hma an lak vat loh chuan, tuna an inbiakna boruakah ringawt hi chuan, ngaih a 

ṭha thei thlawt lo a ni. Pute u, hma thar han la leh teh u khai.