'Indigenous' a hrilhfiah theih chiang!

August 4-a Vang­laini chhuakah khan Law & Judicial Dept. chuan 'Indigenous' chungchangah 'UNO pawhin a hrana hrilh­fiahna a nei lo' tih thu an sawi chu chhuah a ni a, MZP te duh dana hrilhfiah ngawt theih a ni lo an ti.

Dan lam hrechiang zawka ngaihte thu­chhuak a ni a, a pawm nahawm viau nain, kei erawh chu ka buai deuh hle thung. 'Indigenous' hi hrilhfiah ngawt dan a awm lo a nih chuan, dân thua ṭawngkam hman tam tak, a hrilhfiahna an ziah kur ngei nguai ṭhin te, kha dân chhung bika thumal an hman dan bik sawifiahna awm kur ngei nguai ṭhinte hi kei chuan hriatthiam harsa ka ti ta deuh.

UNO-in a hrilh­fiahna dan hranpa pawh nei em em lo angin Law & Judicial Dept lam khan an sawi a. Tuna dan kan neih lai, The Mizoram (Selection of Candidates for Higher Technical Course Fifth Amendment) Rules-a 'Indigenous' pawh hi definition chiang tak awm loin a awm tihna a ni. Ka ngaihdan leh, hetiang dan neuh neuh ka chhiar ve tawhah chuan, thumal harsa deuh emaw, kawh ngah deuh (ambiguous) deuh te chu kha dânin a hmanna chin leh a huamtir chin kha tarlan a ni ṭhin. Chutiang chuan Indigenous pawh hi a sawi chian theih ngei chuan ka ring.

Entirna pakhat han sawi ta ila. The Mizoram Liquor Total Prohibition (Amend­ment) Act 2007 (Act No. 4 of 2007)-ah khan Insertion of Sect 26-A turah 'Licence for manufacture etc. of wine' tih pawh, miin an lak kawih a, a huam loh loh tur an huamtir loh nan a hrilhfiah chiang hle a. The Mi­zo­ram (Selection of Candidates for Higher Technical Course Fifth Amendment) Rules-ah pawh hian miin 'Indigenous' hi an duh dan dana an hrilhfiah a, an lak kawih loh­na turin chiang zawka sawifiahna hi a dah theih a ni. 'Indige­nous tih chu a ram luah hmasatute tihna a ni a, he danah hian Indigenous chu Mizo­ram native, Zohnah­thlak, British-in Mi­zoram a awp hmaa Mizoram lo luahtute...' tiin a sawifiah theih ka ring khawp mai.

Law & Judicial-in 'a hrana hrilhfiahna a awm lo' a tih ringawt hi chu a logic lo hle. 'Indi­genous' tih ṭawngkam hi 'native' tia lehlin leh sawifiah pawh lo ni ta tehreng se, rules kan siam he thumal kan hmanna 'native ' tihin a huam chinte hi chu a sawifiah theih khawp ang. Chutianga sawifiah theih loh a nih chuan keini Mizote pawh hi America-ah pawh 'Indigenous' kan ni vek dawn tihna em ni?

'Indigenous' hi dictionary leh UNO-in a awmzia a tarlan bakah, dân kan siam huang chhunga kan hman dan bik kha a sawifiah a, hrilhfiah theih dan hi a awm ngeiin ka hria. Chu­vang chuan MZP leh tlawmngai pawl dangte pawhin 'Indigenous' tihin Mizoram chhung bika kan kawhtir leh kan sawi bik a hriat theih dan turah hma han la zel teh se.

- Rochungnunga