Sorkarin pawisa a rukin a hum nge Pu Zodintluanga'n dawt a sawi?

Covid-19 ninawmna leh chimawmna lian ber chu mihring leh mihring kan in hlau tawn hi a ni. Kan unaute ngei phai aṭanga lo hawte kan hlauvin kan thinhrik pawh hi Covid-19 vang a ni. 

Hetih lai hian Mi­nister hlui Pu Zodin­tluanga'n sorkarin Mizoram sorkar budget khawih chet duh loh thu a sawi hi a dik a nih ngat chuan mihring leh mihring hi kan in chhuahchhal chho dawn a ni. 

Congress Legislature Party Leader Pu Zodin­tluanga khan Financial year 2019-20 budget aṭangin Mizoram sorkarin SEDP-ah ringawt pawh cheng nuai 18,837.28 hman loh a la neih thu a sawi kha chanchinbuah kan lo chhiar ve a, "Hei hi lapse thei a nih loh avangin hman theih a la ni," kha a ti a. Hei hi dawt a nih si loh chuan a lo va mak thei ngai dawn ve mawle aw? 

A sawi lan pakhat leh chu, "Sorkarin a duh phawt chuan project ṭhenkhat atana sum a dah tawhte chu Covid-19 do nan a hmang thei," tih a ni leh a, hei hi chu CM Pu Zoramthanga thusawi nen khan a inthlawp 

ṭha tlat. Kan Finance Minister ni bawk khan, "Budget chu kan duh leh kan kang thei a, kan chhum thei a, kan bai thei," a lo ti tawh a, Mizoram sorkar hian an duh tak tak chuan Mizoram budget a sum awm hi Covid-19 dona atan an hmang thei a ni. 

June 22-ah khan I&PR website chuan CM Relief Fund for COVID-19 a sum lut zat (22.06.2020 4:00 P.M.) an ziak lang a, tah chuan 17.21 crores a tling tawh  a ni. Heng pawisa awm zinga Rs. 8,25,32,560 hi hman tawh niin, a la bang zawng hi Rs 8.95 crores a ni. CM Relief Fund lama pawisa hi kan hmang ve malh malh tawh viau a, mahse chumi kan hman ai chuan kan hman bang hi a la tam zawk a, mipui hi chuan Covid-19 dona lam hi kan thawh ṭha a ni. Sorkar hian pawisa a ruka hum tlat nei chung hian mipui hnenah sum a khawn kual mai mai zawk em ni le? 

Pu Zodintluanga hian dawt a sawi a nih chuan MNF lam tan chuan na taka khen lêt tur a nih mai bakah FIR thehluhna tham a tling a ni. SEDP-ah sorkar hian 2019-20 budget lama a pawisa dah tawh nuai hlir 18,837.28 chu a la khawih che duh miah lo tiin a puh a ni. 

Pu Zodintluanga thusawi hi a dik loh chuan amah hian tuar se, a thusawi hi a dik a nih chuan, sorkar hnena thawhlawm pek zel hi a ngai tawh em ni? Nakina sem mai mai tur a la khawl ṭin ṭen a, mahse quarantine centre-ah kohhran building te an hmang a, kohhran tam tak chuan ei leh in man an tum sak bawk nen, mipuiin CM Relief Fund-ah pawisa kan thawh khawm ṭha bawk a, sorkar hnathawk hlawh bat aiin SEDP pawisa bat dan a awm zawk lo maw? 

Ka zawhnate hi a hre chiangin chanchinbu kal tlang talin rawn chhang teh se. Hetih mek lai hian Covid-19 dona atan mi inphal kan awm chuan midangte ṭanpuina rilru nen chhung lut zel tho ang u. He hri hian min kiansan ngei theihna atan i ṭawngṭai zel bawk ang u.