District kan mamawh belh lo

District ngen hun a thleng leh ta. A khaw chhehvel chuan a ṭhatna sawi tur hre hnem hle mahse Mizo mipui nuai 10 lek enkawltu tur hian District pariat pawh hi a tam lam a ni tawh a, tuna District tihpuitlin ngiatte hi chuan thil an thlir zau tawk lo a ni.

"Sorkar hian District min pek chuan kan khuaah sorkar hnathawk an tam ang a, sorkar sum a lo lut tam ang a, khuain kan ṭangkaipui dawn," tih vel ringawt hi kan District ngen chhan a ni hlawm a, hei hi chu tih loh tawp tur a ni. Mizoram sorkar hian District thar dinna tur leh enkawlna tur sum leh pai a ni lova, hun rei tak chhung District lo ni tawh Mamit, Lawngtlai, Serchhip leh Champhai-te pawh an nih tur anga an la indin hmaa a thar pathum tihpuitlin hi chu thil remchang lo tak a ni.

Mi ṭhenkhatin District thar siam hi thil awlsam tak angin an sawi ṭhin a, hei hi an thlir dan a fuh loh vang a ni. District hian ken tel tam tak a nei a, chu a thil ken telte tel lo chuan District hi kalpui ngawtin awmzia a nei lo. District hian ken tel a neih tam ber hi chu sum tam tak senga din chawp ngai a ni a, chu chu mahni khua leh a chhehvelin hma a lo sawn ve theihna tur leh sum leh pai a lo luh tam theihna ringawt zawn aṭanga thlir chi a ni lo.

District headquarters aṭanga lehkha pawimawh la chhuak tura thui tak kal ngaite hi kan han chhuanlam a, India ram state danga hetiang la tura an kal thuiziate hi kan ngaihtuah lova, District headquarters-te hi hnai tak taka awma awlsam taka tlawh pawh zung zung theih tura ngaihna kan nei hi chu thil kan hriat tawk loh vangah ka ngai.

Mizoramah hian mipui awm zat kan hria a, kan District neih zat kan hre bawk a, mi pangngai tan chuan District thar ngiat belh hi thil tih chi a ni lova, Mizoram hmangaihtu tan chuan insum hun lai a ni. Politician te pawh kha lo ngawi mai mai ula, vote duh vangin eng thil mah lo tiam thawt thawt tawh suh u. Mizoram hi kan ram a ni ve a nia, nang ni vote duh vanga enkawl hleihtheih loh khawpa sawp tur a ni ngawt lo.

- Lalhmangaiha Hnamte