Social Media hman thiam

Kan duh emaw duh lo emaw social media hi kan ban phakah a awm zel dawn a, he thil ṭangkai tak hi kan ṭangkai pui em em rualin, min tichhetu a nive thei a ni.

Khawvel hmasawn­na in a ken tel a nih miau avangin social media hi do chi a ni loa, do phal chi pawh a ni hek lo. He hmasawnna thil duhawm tak hi kan pawng do a nih ngat chuan kan ram leh hnamin hmasawn aiin hnungtawlh lam a zawh zawk ngeiin a rinawm. A ṭangkaina hrethiam apiangin an hlawkpui mek a, mi tam tak chuan sum tam tak lakluhna atan an hmang mek a ni.

Mizoramah pawh social media hi mi tam takin kan hmang mek a, ṭangkai tak taka hmang an awm laiin, kawng tam taka chhiatpui pawh an awm mek a ni. He thil ṭangkai tak hi a chhiatpuitu nih a hlauhawm a, chuvang chuan kan tlai hmain kan fimkhur a ngai takzet a ni.

Kohhran, khaw­tlang pawhin social media hman sual a nih lohna atan tha an thawh a hun tawh hlein ka hria, a nih loh chuan he thil ṭangkai tak hi kan ṭhalaite hian an chhiatpui mai ang tih a hlauhawm a ni.

Tuna kan dinhmun han thlir ila social media avanga harsatna tawk an awm mek a, intihmualphona leh in chirh theihna atana hmang duh tawkte an pung zel a ni. Mi tam tak social media avangin an nun a chhiat phah a, mualphona khurah an tla lut mek a ni. Hetiang anga kan hman zel lohna atan hian ke pen an awm a ngai.

Zirlai tam takin an zirna hlam chhiah khawpin social media an tuipui mek tih nu leh pate'n an hriat loh ka hlau hle mai. Chuvangin, nu leh pate u in fate computer leh mobile phone khawih dante ngun takin vil ang che u, an zirnain a chhiatpui mai bakah, naupang chana in chan kha social media-ah chuan nula/tlangval talin an tal anga, an zirna mai bakah an nunin a chhiatpui hlauh dah a nge.

Kan kohhran nun thleng pawhin social media hian nghawng a nei mek a, chuvangin kohhran pawhin social media hman dan ṭang­kai zawka kan hman theihna atan pulpit tlang kan hman ṭangkai a pawimawh tawh hial awm e.

Naupang sande sikul inkhawmahte hian social media pawi­mawhna leh a hman sual theih dan inzirtir ṭhin ila thil awm lo a ni tawh hauh lo ang.

Social media-ah hian zalenna zau tak nei mah ila, min khuahkhirhtu dan tam tak a awm tih kan hriat loh a hlauhawm hle. Mi tam tak chuan dan leh dun a awm tih an hre hauh loin a rinawm. Chuvangin, social media dan leh dun hian zawm a hlawh theihna atan dan kengkawhtute pawh khauh zawka an kal a pawimawh awm e.

Ngun takin thunei­tute hian social media hi han vil ṭhin se, dan bawhchhetute chu han man zat zat mai se chuan tun ai hian social media hman kawngah kan ramin hma a sawn ngei ang.

- Tluang Tluangi Pa