MIZORAM MAU TAWLHAH SORKAR A HLAWK HLAWL LO
Mizoram aṭanga Mau tawlh chhuah hi a thlalak te Mizoram Calendar-ah hial tarlan a lo ni tawh a, Mizoramin a hlawkpui te ka lo beisei ve ṭhin a, hriat chian tumin RTI hmangin ka zawt ta rawih mai a.
PCCF Office-in mau thawnchhuah zat hre lo!
Ni 11 May 2022 khan PCCF Office a SPIO chu RTI in Mizoram mau permit pek zat leh thawnchhuah zatte ka zawhna chu PCCF office-in record an neih loh avangin DFO office hrang hrangah ni 27 May 2022 khan an zawt leh chhawng (pass on) tih min rawn hriattir a. Hetiang thil pawimawh nia hriat pawh PCCF office meuhin an lo hre lo hi a mak hle mai! An ngaihsak lovin an ngai thutak lo tih a chiang hle.
Hetiang thil an hriat ngei tur ang chi hi chu ngai pawimawhin hre thlap tur an nih laiin PCCF office hian record hi a lo vawng ṭha lo hle nia lang hi thil pawi tak a ni. Tun hnuah chuan Forest department hian data pawimawh hrang hrang record hi mipui a mamawhtute tan vawng fel ve deuh tawh se a duhawm khawp mai. RTI zawhna Sorkar Department-ten thla khat chhunga chhang tur an nih laiin tun ṭum ka zawhna chu 11 May 2022 ah ka thehluh laiin August 2022 kar khatnaah RTI chhanna hi ka hmu kim ta chauh mai a, an vuaicha hle a ni.
Divisional Forest Office sawm (10) aṭangin Division hnih (2) chauhin Mau permit hi an pe chhuak niin a lang a. Heng Mamit, Darlawn, N. Vanlaiphai, Champhai, Tlabung, Aizawl, Lunglei leh Thenzawl Divisional Forest Office te chuan Mau permit an pek chhuah loh thuin min chhang a ni.
Mau tawlh aṭanga Sawrkar sum hmuh a tlem!
Kawrthah Forest Division hian kum 2018-22 chhungin Mau tawlh aṭangin Rs. 12,14,150/- hmuin sawrkarah an chhung lut niin an in sawi a. Kolasib Forest Division (Forest range 4) aṭangin kum 2018-22 chhungin Rs. 4,53,500/- mau tawlh aṭangin Sawrkarah an chhung lut niin min chhang.
Kum 2018-22 chhung hian Mizoram Sawrkarin mau tawlh aṭangin Rs. 16,49,650/- chauh zuk han hmu a! Chu chu kum khatah Rs. 4,12,412.50 chauh zuk ni a! PCCF thla khat hlawh aiin a tam deuh awrh chauh niin lang. Heti khawpa state pachhia leh sum lakluhna nei lo Mizoram Sawrkar hian Mau tawlh hi a lo hlawkpui hlawl lo a ni.
Mizoram Forest Department hian awmze neiin Mau hi buaipui tawh rawh se. RTI a ka zawhnaah hian Mau tawlh chhuah a nih dan, permit eng zat nge pek a nih dan te, tute nge endik (verifying officer) leh endikna lehkha (verification report copy) ka dil te chu min pe thei lova, min pek chhun lah chu non Forest area a Mau chin endikna (plantation verification report) copy niin Mau tawlh zat endikna a la ni lo leh ta nghal a. Endik an harsat thu sawiin an endik ngai lo a ni ber a, permit ang ni lovin duh zat zat Mau hi an tawlh thei a nih hmel ber e. Central Sawrkar hian ram ngaw leh nungcha humhalh ṭul a tih em avangin Forest department hi forest product aṭanga sum lakluh hi a remti meuh tawh lo nia sawi a ni a, chutih laiin kan state hi a pachhiat em avangin sum la lut tura beisei Mizoram Sawrkar department te zingah Forest department hi an la tel niin a lang a. Hengte avang hian ni maw “Mau mahal a tawp ti siin permit system-in kan kal” an ti a. Mau mahal leh Mau permit system hi a kalphung a lo danglam deuh a nih pawhin kan lui hmanga Mau tawlh hi a bahlah chuang lo in Mau tawlh a tlem phah pawh kan hre chuang si lova, Sawrkar a sum lut lah hian awmzia a nei tham chuang bawk si lo.
Nge nia a thawktute lam hian an lo hlawkpui viau zawk? Mau tawlh hi tunge hlawkpui ta ber le? Heti khawpa Mizoram mipui leh Sawrkar tana hlawk lo Mau tawlh hi tawp ta zawk se la kan ram hian a ṭhatpui zawkin a rinawm.
- VL-a, Tuikual South