CM fanu leh Mizoram media

Mizoram Chief Minister Pu Zoramthanga fanu Milari Chhangte chuan hman ni khan Mizorama doctor hmingthang tak, dermatologist Dr Zonunsanga chu a beng/ hnek pek a. A beng lai video hi chiang takin a awm a, India ram media lamin an lo hriat hnuah chuan nasa takin ram pum hriatah an vawrh darh a. Chutihlai chuan Mizoram media lam chuan an ti tlangthang mang lo a, he thil thlengah hian Mizoram media ten fak an phu thlawt a ni.

YouTube-ah Pu Tetea Hmar thusawi ka hriat reng chu, "Media-a thawk­tute hi chuan thlit­fim tawh sa an chhuah ṭhin a, social media hrang hrang Facebook leh YouTube lamah hi chuan a thlifimtu an awm tawh si lova a nihna ang angin an chhuah mai ṭhin, thlitfim loh a nih vangin mi tana pawi tur pawh an thliar ṭhin lo" tih kha a ni. Mizorama media lam chuan CM hi tihmualpho tum zawngin ka hriatah chuan an tarlang lem lo khawp mai.

Thil thleng lian tak a nih avangin Indian Medical Association, Mizoram chapter lamin badge dum an bel phah hial thute chu an ziak lang ve a, nimahsela CM tihmualpho tum hrim hrim leh political party beih zuina rawngkai chuan kan media house lianah hi chuan kan hmu lova, a lawmawm hle a ni.

State danga thil thleng chu ni se Chief Minister fanu meuhin mi hmuhlaia doctor hming ṭha tak kut a thlak hi chu headline ah an hmang chuai chuai ngei ang le.

Hetihlai hian national media lam beng a thlen ve hnu kha chuan an chhuah nasa hle mai a, Google aṭanga zawn ringawta a video nena chhuahtu lo langte chu NDTV, Economic Times, Hindustan Times, Times of India, Republic World, India Today, India Times, Times Now, The Sentinel, Mirror Now leh a dang tam tak an ni a, Live Mint leh The Quint te pawhin chiang takin an ziak. Zee News lamah pawh a lang a, The Print pawhin an chhuah a ni.

He thil thleng hi tute mahin thleng nawn se an duh loh a ni a, hemi kawnga Mizoram journalist te chet dan a fakawm ka tiin a puitling ka ti hle a ni.

- John Lalrema