BJP, Hindu, MNF leh Congress
Tunlai chu chanchinbuah thu inchuh deuh ni si, a langa sawi tlang ngam si loh a awm a, chu chu BJP leh MNF inzawm leh inzawm loh thu a ni. He thil tichiangtu atan MNF-in India President inthlana BJP candidate an vote kha an rawn sawi teh sek a, thu chiang zawk ka hriain ka inhre ve tlat a, in ngaihdan ni tak maw?
BJP hian Mizoramah hian thuneihna chan an duh hle tih chu an chet zia aṭangin a lang tawh. Amit Shah leh Narendra Modi hi an fing takzet a, Manipur-ah Congress aia MLA nei tlem daih siin BJP hian MLA bang zawng an thurualpui a, thil hrang hrang tiamin sorkarna an siam.
Goa-ah pawh heti tho hi a ni a, MLA nei tlem zawk siin Congress paih thlain BJP hi an sorkar a ni.
Mizorama BJP tum ber chu eng ti kawng pawha MLA pakhat tal neih a, MNF nen inzawma sorkarna siam a nih ka ring. MLA neih an tumna chu tuna Chakma awm tamna bakah Serlui bial lam hi a ni a, Kawnpui velah pawh hian ṭan chu an la nasa khawp mai. Tichuan, MNF president-in Chakma MLA candidate neih loh ṭha an tihzia a sawi khan, “BJP kan kian ang e,” a tihnaah ka ngai a, Chakma awmna bialah hian BJP-in MNF aiawhin candidate an siam ka ring ve tlat mai.
Tichuan, BJP leh MNF thawhhona chu President thlan hma daih khan a awm tawh a, chu chu North-East Democratic Alliance (NEDA) tihah a ni. NEDA sawifiahna chu, “NEDA is a political coalition that was formed on May 24, 2016 by Bharatiya Janata Party along with regional political parties like...” an ti a, state hrang hranga BJP hnuaia intulut zawng hming a lang a, MNF pawh a lang.
Hei vang hian Congress hian chan ṭha an chang tihna a ni hauh lo. MNF hian BJP pawisa leh tha an ring ang a, an chak thut thei. Mizote hian BJP leh Hindu inzawmna hre chiang mah ila, a MNF ber hi an Hindu ve loh a, Modi sorkar a chet ṭhat viau si chuan, India rama Hindu thehdarh tumtu BJP hi MNF nen inkawpin Mizoramah an sorkar mai thei, Congress hi an nep chhoh zel chuan a thleng thei tlat. Hei hi thil awm ngei ngei tur a ni kher lo thei a, thil awm thei a ni tih erawh ka chiang.
- H. Lalrintluanga