AMC-in thlai zuar ṭhutna a pek hi

Tunhnai khan Aizawl Municipal Corporation (AMC) chuan Tuikual Local Council huam chhunga Horticulture leh Agriculture Direc­torate zawn leh a kawt kawngpui sirah thlai zuartute tan ṭhutna a pe a, heng hawker-te hi Inrinni leh office chawlhni atana an inzawrhna tur ni awm tak a ni.

AMC hian Aizawl khawpui inawp dan leh mipui tana ṭang­kai turah hma tam tak la tawh a, a la la mek dawn ni pawhin a lang. Chutih rual chuan mipui mimir tan a ṭangkai vek em? Lirthei vakvel tan a hnawksak em? tih hi an chhut ve tho laiin an chhut kim loh tam tak a awm thei awm e.

He Agriculture Directorate bul phei hi Inrinni chuan kawnga lirthei kal hrehawm leh traffic ti jam khawpin chawhmeh zuarte an ṭhu ṭhin a ni. Hetih laia phalna pe a, an ṭhut man an chawi phei hi chu thil ṭha ber a ni ang em? Phalna nei lem loa an ṭhu mah hnawksak tih tawh naka laiin, an dawhkan tur thlenga ruahman sak hi a dik ber lo mai thei.

AMC hian anmah­ni intun nun nan leh mipui tana thil ṭha tam tak tih tumin hmachhawp tam tak a nei a, chuta tan chuan sum thawhchhuah lamah nasa takin hma a la mek a. An sum hmuh aṭanga zaa engemawzat chu mipui vantlang hmunhma siam nan chuan an hmang tehmeuh mai. Mahse an sum lakluh tam duh luatah leh mipui tana thil ṭangkai ti anga an inngaih lai hian harsatna a thlen tam thei hle tih chu a lang reng mai.

Lirthei a lo pun zel lai hian AMC chuan hman deuh khan kawngpui sir awl hlek chu parking fee lak nan an hauh chho ta zel a, lirthei han dinna hlek tur pawh awm lo, din hleka pawisa chawi ngai hlir a ni ta mai pawh hi a ngaihmawh awm hle.

Kawngpui kam hi PWD kawng vek a ni a, chu kawng zawh tur leh kawngsir maia lirthei han dah zawk duh tan pawh hmun a awm ta lo a. Lirthei neitute hian kum 15 te, kum 10 te, kum nga chhung atan te road tax etc. an chawi a, chuta chhapah kawngpui sir zawng zawngah parking fee chawi a la ngai hi chu state dangte tihdan chu a ni lo phawt mai.

State dangah chuan kawngpui sir zawng zawngah parking fee an la lem lo. Kawngpui sir piah lama hmun awlah te, a hmun tur ruat bikah te chuan parking fee an la ṭhin. Keini Aizawl leh district headquarters-ah chuan kawngpui sir sum siam nan kan hmang ta vek hi mipui zah lohna lian tak a ni.

Chutiang bawk chuan AMC-in kawng­pui kam leh lutuka sum siam nana inzawrh an phal hi ennawn leh a ṭha khawp mai. Mipui tana thawk an nih angin mi tlemte tana hmun siam a, sum lak luih tam ṭum ringawt hi chu a fel hlel deuh chu a ni.

- Lalduhawma