Social media leh Zoram Politics
Tun hnaiah Mizoramah pawh khawvel ram dangte ang bawkin internet a lo chak ṭha ve ṭan ta a, chumi rawn luhpui chu Social Media a ni. Social Media hian kan hnam nun nasa takin a nghawng mek tih hai rual a ni lova, hei hian kan politics pawh hi a nghawng nasa tawh a ni.
Kum 2023 ah phei chuan a nghawng na zal dawn a, Social Media sawi nep tum leh in sawi thlamuan chawp hi Political strategy dik lo leh hlauhawm ber a ni hial ang.
Ministry of Information and Broadcasting tarlan danin India ramah hian mi vaibelchhe 20 velin internet an hmang a, heng zinga a tam berte hi kum 18-35 in kar mi an ni. India pumah hian inthlanah hian a vawi khatna atana vote thlaktu (first time voter) hi vaibelchhe 10 vel an awm ṭhin a, hei vang hian internet leh social media lama politics thil hian nasa takin India inthlanah nghawng a nei tih hi zir mite chuan an lo pawm tawh a ni.
Mizoramah lo la lut dawn ta ila. Kum 2018-a vote la nei lo mi ṭhahnem takin kum 2023 ah hian vote an thlak dawn a, heng zinga mite hian duhthlan tur an neih chu MNF, Congress leh ZPM a ni a, hmun ṭhenkhatah chuan BJP pawh a ni ang.
Heng mite hian an chhehvela thil awm dan an thlir thiam a, social media an khawih deuh vek bawk dawn a, chuvangin anni tana vote chakawma kan awm loh chuan, "Pa Pu aṭangin Congress kan ni," tih leh, "Ka Pa hi Pu Duhoma ruhkawl a nia," tih emaw, "Pu Denga hunlai aṭangin MNF lo chu kan hawi lo," tih ang kha kan ṭhangtharte hian an kalsan tawh a ni.
Heng thil hre reng hian ruling MNF hian social media lama in image chhe tak mai hi siam ṭhat in tum loh chuan SEDP pawh sem engang mah ula in tla tho dawn.
Congress hian an sorkar hunlaia an tihsual an sim thu leh ṭhat loh theih lohna bawm hi thiam taka an au pui avangin mihring ngai reng mah ni se a awih tawk an awm a, social media lamah image an siam ṭha tlat a ni.
ZPM hian social media strategy hi an nei vak lovin a lang a, MNF leh Congress an hnial a, "Kalphung thar, mipui sorkar," an tih tak hi an sawi tlem a, neutral lamah mark an hmuh hnem dawn chuan mi hnial aiin an party au hla hi aupui tam se an ṭhatpui ang.
Social Media hi do a sawt lova, a lama ṭan thiam leh chhawr thiam a pawimawh zawk. Kum 2023 election lo awm turah hian House to House campaign aiin Social Media campagn hi a sawt zawk ngei ang.
- Lalthanmawia