CHIEF MINISTER CAR THAR (Political Ball atan bawk maw hman kan tum leh tak?)

Session-ah CM.Car thar lei thu sawi lan a ni a, thu bulbâl dik tak hre hawt si lovin rinthu leh zêldin thu nena amah kan Chief Minister tihmualpho leh, a laka mipuiin rinna kan nghahna tihnêp theihna a nih beisei niawm fahrana bawl kual vel kan han awm ṭan leh ta pang mai chu a ni a. Nakkum inthlanpui kan hnaih tawh vàng ni maw. Social media meuhva vawrhdarh tur hi chuan chhui chian hmasak deuhte pawh hi a duhawm mang e, ka ti ṭhin.

Social media lama ka hmuh hmasak chu David Sailo thuziak hi a ni. Ngun taka ka lo chhiar hian a thu kalpui dan hian mipui thinlungah ngaihdan dik lo tak a tuh thei mai dawn nia a lan avangin thudik ziktluak zawk hi a náka zen chung ngei hian tarlan ve hi a ṭulin ka hria.

1. David Sailova'n khawpui chhunga CM.in veiváh nana Hyundai Verna Car hmang ṭhin anga a sawi hi chu a rinthu a sawi sual a ni mai thei. A chhan chu tunah hian CM hian Hyundai Verna Car hi a kawl lo hrim hrim a ni.

2. Toyota Carolla Altis MZ-01P/0007.

Hei hi tuna official Car/Main Car atana a hman chu a ni a, he Car hi sorkar hmasaa mi a la chhawm a ni.

3. Mahindra Scorpio MZ-01-S/1606

He Car hi SAD aṭanga Spare/Support Car atana an rawn pêk a ni. Sorkar hmasaa mi a la chhawm a ni.

4. Jeep Campass 4X4 MZ-01S/6007

CM hian PWD a enkawl avangin khaw karkawng kilkhawr tak taka kal a ngaih ṭhin avangin chutiang chánga a hman atan chuan kawng diak leh nâl pawh ngam deuh turin he Car hi a kawl a ni.

5. STORM MZ-01K/7707

Hei hi Pool Car a ni.

6. Jeep Campass MZ-01X/7733

Hei hi tuna lei thar tak chu a ni. Official/Main Support Car atana hman a ni.

7. MZ-01T/0909

Hetiang Motor hi CM hian a nei lo hrim hrim a ni. (A duh tan VAHAN-ah en theih a ni ang).

8. Carolla Altis Car MZ-01E/7773

He Car hi sorkar hmasaa mi tun thlenga a la chhawm bawk a ni a. Khawpui chhûngah bák hman a ni ngai lo, lam hla zawka kal nan hman tlák a ni tawh lo. CM hian sorkar hmasaa mi hlir a la chhawm zawk a. Tin, CM car hi thlâk a nih chuan SAD (SAW)-ah pêk lêt zêl a ni bawk.

Mizoramah hian Z+ Category VIP pahnih chauh kan nei a, chungte chu Chief Minister leh Governor-te chauh hi an ni. India ramah hian Z+ Category chin ngat hi chu uluk taka venhimna pêk vek an ni a, chuvangin khawpui chhung leh Highway-ah pawh an tlân muan zawng tur thlenga bituksak vek an ni. Muangchanga tlanpui phal an ni lo. Hemi hre lo hian kan VIP-te chak taka tlànpui an nih hian anmahni VIP-te intih lal emaw, an nawmchenna emaw tia lo helh tawk kan awm fo ṭhin. Hei hi kan hriat loh vang a ni a. Highway-ah phei chuan 40 kmp aia muanga tlanpui phal an ni lo. Chuvangin an chuanna Motor pawh a fit ṭhat a ngai bik êm êm a, kawng lakah an Motor a chhe thiang ve lo, ti ila, kan sawi uar lutuk lo vang.

Heti chung hian Lirthei rêng rêng hi a thar pawh ni se, ho tê avanga harsatna tawk mai thei vek tho an nih avangin hetianga harsatna tawh thulhah, Z+ Category VIP-te hi chu an chuanna Car a lo chhiat palh pawha thlák nghál zung zung theihna turin an chuanna Official/Main Car ang chiaha buatsaih (Jeep Campass-a chuang a nih chuan Jeep Campass bawk), National Flag leh Designation plate társain a zui ngei ngei a ngai ṭhin. Hei hi Spare/Support Car an tih chu a ni a. Security thilah pawh venhim a ṭul bik hunah khawi zawkah nge a chuan tih hriat theih lohna turin security threat leh assasination attempt pawh lo awm se, hriat hran theih loh khawpa inang a ni tur a ni. (Assam CM-te ngat phei khu chu a khawiah ber nge a chuan tih pawh hriat theih loh khawpa tam Spare Car hian an zui ṭhin). State dang CM carcade te nena khaikhin chuan kan CM carcade hi chu thinrik ang lek a ni.

Tin, CM Car meuh nam ngai hial kha awih lo tawk kan awm mai thei. Hei hi thudik a ni. CM Bungalow kawng chho leh Ramhlun road-ah pawh hian Motor engine fel loh vangin vawi hnih vawi thum Guard hovin an nampui ṭum pawh a awm hial tawh a, Driver pawhin vawi eng emaw zat Guwahati-ah a zu siamtir nghe nghe tawh a ni. State dangte'n min hmu ang tih hlauhawm khawpin CM Car hlui kawl ṭhenkhatte hi an lo ṭâwng tawh a ni tih hi kan hriatpui kher awm lo ve. Awih lo tan chuan Security Guard te pawh zawhfiah theihin an awm reng a ni.

Tlipna

Tuna kan sorkar hrawn mêk hi kan Minister leh MLA.te thleng pawhin sawisel an kai lo hlawm khawp mai a. Kan Minister-te hi eirukna, mipat hmeichhiat hmansualna, zu leh sa leh nawmsip bawlna hrang hrangahte hian sawisel an kai lo khawp mai a. An opponent-te tan pawha beih ngaihna awm lo khawpin an felfaiin hmingchhiatna an nei lo, ti ila, kan sawi uar lutuk lem lo vang. Hei vang tak hian an opponent-te tán pawh beih ngaihna an awm si lovah chuan pu ber beih rawn mai loh chu tihngaihna dang awma a lan loh avangin, kan CM hi rem leh rem lovin an beih rawn ta ṭhin a ang khawp mai. Thudik hrûlah hian thusawi reng reng hi àwmang tak hian kaihlek theih a ni fo ṭhin a, hei hi mi tam tak chuan chin pawh an ching viauin a lang. Entir nan: Kan CM hi a sorkar hmasak ṭum khan PTC Lungverhah Police Passing Out Parade-ah khualliana a zu ṭan dawn khan, kalkawnga kan titinaah Police Constable leh ASI ṭhenkhat, Dy.SP.leh Addl. SP hiala kaisang ka hriatte ka sawi a, ani pawh chuan LDC aṭanga Dy.Secy-a kaisanga hriat a sawi ve bawk a.

Chutichuan Parade ground-a thu a sawinaah chuan Police pass out tharte a fuihnaah chuan theihtawpa hmasawn tuma ṭan an lâk chuan, Police lal tak thlenga kaisan theihna potential ṭha tak an neih thu a sawi a. Chutichuan a tûk lawkah chuan Party ṭhenkhat PR-ah chuan, "Kan CM-in Police Contable aṭangin DGP thleng a kaisan theih a ti," an rawn ti ta mai a, chumi lo chhiartu mipui tan chuan "Eheu! kan CM chuh," tih loh rual a ni ta lo rêng a ni.

Hetiang hian thudik behchhan si, a kawh dang daih sia mipui rilru hruaikawi thiamte hi tunlaiah chuan Politics thiam emaw tih tur khawpin ṭan hi kan la na ta niin a lang.

- BMa Ralte MPS (rtd)