Kohhran thawhlawm leh Mizoram budget

Mizoram Budget-in eng tiang chiahin nge Zoram mipui-ah nghawng a neih tih hi Mizorama Kohhran lian ber Presbyterian Kohhran kum 1999 - 2007 inkar leh kum 2015-2016 inkar chhunga thawhlawm pun san chhoh dan aṭang hian a hriat theih awm e.

Kum 1999-2000 inkar chhung khan Aizawl khawpui Presbytery 4 ah Dan zawh kim pakhatin thawhlawm a thawh zat chawhrualin Rs. 1324 a ni. Khawpui pawn Presbytery 20 ah chuan chawhrualin Dan zawh kim pakhat in Rs. 397 thawh ang lek a ni thung. Kum 2000 - 2001 inkar chhung khan khawpui lamah Dan zawh kim pakhatin chawhrualin Rs. 1580 a thawh laiin khawpui pawn lamah chuan Dan zawh kim pakhatin chawhrualin Rs. 619 thawh ang a ni thung. Kum 2002-2003 ah chuan khawpui lamah Dan zawh kim pakhatin chawhrualin Rs. 1625 a thawh laiin khawpui pawn lamah chuan Dan zawh kim pakhatin chawhrualin Rs. 629 chauh thawh ang a ni. Kum 2006-2007 inkar chhung chuan Dan zawh kim pakhatin a thawh zat chawhrualin Rs. 1960 a ni a, khawpui pawn lamah thung chuan Rs. 735 lek a ni thung.

Heti em ema khawpui lam leh khawpui pawn lam Kohhran thawhlawm a pun san chak loh chhan nia lang chu mi hausa leh sorkar a mi thil titheiten Mizoram Budget an inchuh fai vek ṭhin vang ni berin a lang.

Khawpui chhung chu mi hausa leh sorkar hnathawk tamna, sumdawnna hmunpui awmna a nih avang te hian thawhlawmah chuan tluk rual a ni lovang. Amaherawhchu, kum 1999 - 2007 inkar chhung Kohhran thawhlawm a pun san chak lohzia chhutin Mizoram Budget-in Zoram mipui nawlpui fairel bel a thlen phak ṭhin lohzia a tilang chiang hle.

Kum 2015 Synod Bu, Statistics report-a a lan danin Mizoram chhunga Presbyterian Kohhranah Dan zawh kim mi 3,56,000 zet an awm a. Aizawl khawpui Presbytery-ah Dan zawh kim mi 1,52,084 awmin khawpui pawn lam Presbyyery 28 ah Dan zawh kim 2,03,916 zet an awm bawk a ni. Synod Finance Report 1st April, 2015 to 31st March, 2016-a a lan danin Mizoram chhung bik Presbyterian Kohhranah thawhlawm Rs. 1,50,73,25,489 zet hmuh a ni a. Aizawl khawpui Presbytery aṭangin thawhlawm Rs. 95,77,18,305 a lut a. Khawpui pawn lam Presbyttery aṭangin thawhlawm Rs. 54,96,07,184 a lut bawk. Tichuan, khawpui lamah chuan Dan zawh kim pakhatin thawhlawm a thawh zat chawhrualin Rs. 6297 a thawh a, khawpui pawn lamah chuan Dan zawh kim pakhatin a thawh zat chawhrual chu Rs. 2695 a ni thung.

Heti em ema kum 1999 - 2007 inkar leh kum 2015-2016 inkara Kohhran thawhlawm khawpui chung leh khawpui pawn lam pun san chhoh dan leh a inthlauh em em dan han en hian Mizoram sorkarin NLUP a sem vang a tih loh theih loh. Kan sawi tak angin khawpui lam leh khawpui pawn lam chu thawhlawm thawh danah a inthlau lo thei lo.

Amaherawhchu, kum 2015-2016 inkar chhunga Kohhran thawhlawm heti tak maia pung chho ta mai hi NLUP vang a nih loh chuan eng dang vang nge ni ta ang le? Mizoram Budget-in mi rethei leh harsa zawkte NLUP hmanga a zawn chhuah vang leh heng mite hian work order hum sa a hna an thawh vang ni berin a lang.

MLA election dawn hnaia Congress Party-in NLUP cheng nuaih khat kan sem ang an tih lai khan Party dangte chuan a theih lohzia thu an tlangaupui ve bawk a. Amaherawhchu, a lo theihzia a takin Zoram mipuiin kan hmu chiang khawp mai. Sorkar hmasa lamah beng muka liam zawih zawih min sawi hmuh lai khan kum dang zawng aia sorkar leibat tam kum MLA leh Minister te hlawh nasa taka tih pun kum a nih kha. Tunah erawh NLUP avangin kohhran thawhlawm nasa takin a lo pung a, Mizoram sorkar leibat pawh a zahve dawrhin a tlak hniam phah bawk. MLA election lo awm turah pawh Zoram mipuiten mahni thutiama rinawm hi i hre reng ang u.

Kan ram sualna leh a dam lehna turah hian kan vaiin mawh kan phur a, mahni in en nachang hre lovin kan inpuh tawh ṭhin. Dik tak chuan mipui phu tawk bak Kohhran kan nei thei lova, Kohhran phu tawk bak sorkar kan nei ngai hek lovang. Kan mawhphurhna erawh chu a inchen vek lo.

- JM Vura, Saron Veng, Aizawl