HNATHAWH

Sap ho hian hna­thawh hi Pathian biak­na chi khat ang hial­ah an ngai a, ‘Work is Worship’ tih ṭawng­kam pawh hi a lar hle. Hnathawh hian mihring nun a ti nuam a, hna hi thawk lo ila mihring hi mihring a nih theih lovang tih hial tlak a ni.

Hnathawk peih lo, rualban lo ni si lo te hi kan Kristian nun nen a inmil lo. Paula chuan, “Tu pawhin hna a thawh duh loh chuan ei pawh ei suh se” a ti. Hnathawk lova awm mai mai chu chhiatna leh tlakranna a ni satliah lova, chutiang mi chu an dam rei ngai lo. Thufingte 21:25-ah chuan, “Mi dawngdah duhthusam chuan amah a tihlum ṭhin, a kutin hnathawh a duh loh avangin” tih thu kan hmu a. A tak taka a dikna chen pawh hmuh leh hriat tur a tam mai.

Prison Fellowship dintu Chuck Colson-a chuan ti hian a ziak a: “Pathianin a anpui mihring a siam a, a anpui nihna chu amah Pathian anga hna­thawktu kan nihna hi a ni a. Hnathawh hi Pathian nihna tam tak zinga pakhat a ni” a ti.

Japan ho hi engtin nge khawvel ram hausa ber pawl a nih theih? An ram lah a chhengchhiain ram ṭha ber an ni hauh si lo. Chu bakah lirnghing leh thlipui a tam em em a, India-ah hian an thil tawn hi thleng ve ṭhin se chu kan thi zo thei hial ang chu! An din chhuah chhan ber chu hna an thawh nasat vang a ni.

Mizo te hian hna­thawh hi thil hrehawm tak, Pathian anchhia ang dâwn dawnin kan ngai a. Chuvangin, hnathawh hah vak ngai lova awm theih chu malsawmnaah kan ngai tlat. Nu leh pa tam takin hnathawk lova fate dah thei nih chu nu leh pa hlawhtling nihna emaw kan ti bawk. He ngaihdan hi kan paih a, hnathawk tura siam kan nih dan te, hnathawk theia dam hi Pathian malsawmna a ni tih te hi kan hriat chian hmasak phawt chuan hlawhtlinna hi kan ta a ni kan ti thei tawh ang.

Zokhaw lama nu leh paten an fate hnathawk mai tura an kaihruai

ṭhin kha a ṭhain a zah­awm. Nimahsela, kan ram inrelbawl danin a zir ngang lova an hlawk thei ngang lo a ni. Khawpui lam thungah erawh chuan nu leh paten lehkha kan zirtir ngawr ngawr a, hnathawk lova vulh puitlin kan tum a, chu chuan nghawng nasa tak a nei ta a, inchhung khur lamah pawh engmah tih peih an nei ta lo. A theiin sawrkar hna an thawk a, Mizoram sawrkar hnathawk zingah hian hlemhletna a nasat phah a, heng zawng zawng hi thawhrim lohna rah kan ti thei ang.

Sumdawngte pawh an sumdawnnaah rinawm rawh se. Com­pany-in a man sang ber tur an bithliah (MRP) aia toa bungraw zawrh te; mahni bungraw zawrh lai a nihna bak baka fak te, bûk tling lo zawrh te, bungraw ṭha vak lo ṭha anga hralh tum tlat te lakah inthiarfihlim ang u.

Thawhrim hi kan vela chêngte hnena Chanchin Ṭha hrilhna ṭha ber tur a ni. Kris­tianna thu ṭha tak hrilh vak aiin, mimal tinin rinawm taka hna kan thawh mai hian Chanchin Ṭha chu a thawk sawt daih zawk dawn a ni. Rinawmna hi rangkachak ai pawh­in a hlu zawk si a!

- Vanhmingliana (Taua), Dawrpui