RT-PCR leh ka ṭhenawmpa

Tunlai chu kan zawhna te pawh lir­nghing nge i hlauh Covid19 tih te a ni ta nawk mai. Hmanni pawh ṭhenawm pa nen kan inhmu a, Covid19 test na khawl hi Mizo­ram sorkar hian sum senna tlakah a ngai lo em ni, a ti heu mai! 

Kei hi Pathian zarah scooty pahnih nei chunga nitin ei tur la nei ve thei ka ni a, kan colony-ah scooty pahnih nei awm chhun ka ni. Chuvangin, sor­kar thu leh hla pawh eng emaw chen chu hre ve turah min ngai a ni! 

Kan CM in chiai loh tur tia mipuite a chah te khan ka ṭhenawm pa hi chu a buai zual sauh thung. A chhan chu CM sawi hma hian khatih laia Covid19 test na kan neih chhun RAT kha kan mithiamte leh doctor ten thil rintlaka an ngaih loh thu an sawi an mumangah a lo hmu tawh miau a! Chu chu May thla kha a ni.  

A thil hmuh hi in la zawlnei satliahho aiin a rintlak zawk daih mai, - Covid19 test nan RT PCR khawl chauh rin ngam a nih tak hi! 

Kan CM erawh chuan mipui thlavang a hauh bang lo a, khawl rintlak leia lo in buatsaih ai chuan taksa khawl tihchak lam kha a tuipui a. Exercise la turin mipuite min fuih a. Kan sports Minister nen khan taksa fitness kha an vei dun em em a, Coronavirus leh khawl ṭha lei lam kha an engto miah lo. 

Ka ṭhenawm pa hi tam tak chuan mi mawl angah an ngai a, mahse ka rilru mil tawkin min kawm thiam hle a, ka thu sawi pawh ihe loin a pawm mai ṭhin. Sorkar erawh chu a ring ngam lo bur a, laiking ang lekah a ngai - a changa awr sen, a changa awr dum mai mai ṭhinah a ngai ni berin ka hria. 

Ka ṭhenawm pa hian budget-ah pawisa a tam tawk tia CM-in a sawi ṭhin te kha a awi duh bau lo. A chhan chu tuna kan CM hian an sorkar hmasak pawh khan dream tam tak a sawi a, engmah a hlawhtling lo. Hming sak tur pawh kan nei zo lo ang tih hlauhawm khawpa rethei kan la nih reng hi, a ti et mai. 

Tunah pawh, Coronavirus do tura ma­mawh ang ang chu kan pe chhuak zar zar ang titu khan Covid19 test na khawl pakhat lei pawh a harsat a. CM relief fund lama pawisa pe turin mipuiah kut kan dawh ta a ni ber a. Sorkar hnathawk hlawh puk a lo ngai ta hial a. Mi mawl nia ka hriat ṭhenawm pa hian sorkar hi a lo hmu chiang ber ni maiin ka hre ta. 

Ka ṭhenawm pa chuan opposition MLA ten RT-PCR khawl leina tur sorkar pek an tum sorkarin a phal sak ta lote kha awm a tihpui viau. Mahni fate thil awh em em ṭhenawm pa in a lei sak tur angah a tehkhin a - mipui mamawh ngawih ngawih RT PCR khawl opposition lamin an lei chuan sorkar tan mualphona a ni dawn, a ti a ni. 

'Vai duham laklawh chuan a thlawna ei theih a nih chuan hmarcha pawh thak ti chung chungin an ei ṭeuh thei' an tih te kha min ngaihtuah tir a. Kan Chief Minister hian Manipur aṭanga khawl hawh te, sum thawh tura mipui ngen te, MLA te leh sorkar hnathawkte hnena pawisa khawnte hi budget sum a chhum a, a bai theihna tur a nih dawn phawt chuan zahah a la lo. Hlepah a chhiar zawk niin a lang.